წყალბურთი | მეორე მოგება, საქართველოს 20-წლამდე ნაკრებმა ფინეთი დაამარცხა
პორტუგალიის ქალაქ ოეირაშში მიმდინარე 20-წლამდელ წყალბურთელთა ევროპის ჩემპიონატზე საქართველოს ნაკრებმა ზედიზედ მეორე გამარჯვება მოიპოვა. ქართველმა წყალბურთელებმა ფინეთის ნაკრები დამაჯერებლად, 14:7 დაამარცხეს.
საქართველოს ნაკრებმა უპირატესობა შეხვედრის დასაწყისშივე მოიპოვა და მეტოქეს ოთხივე მეოთხედში აჯობა. პირველი პერიოდი ქართველებმა 3:2 მოიგეს, მეორე – 3:2, მესამე – 4:1, ხოლო მეოთხე – 4:2.
საქართველოს ნაკრების შემადგენლობაში ყველაზე შედეგიანი ივა ჭუბაბრია იყო, რომელმაც 4 გოლი გაიტანა. ლუკა ხურცილავას ანგარიშზე 3 გოლია, ხოლო სანდრო იობიძემ, ნიკოლოზ ყურაშვილმა და გიორგი აბესაძემ 2-2 გოლი გაიტანეს. ლაშა-გიორგი ხუციანიძემ ერთი ბურთი დაამატა.
სამი ტურის შემდეგ საქართველოს ნაკრების ანგარიშზე ორი გამარჯვება და ერთი მარცხია. ახალგაზრდა წყალბურთელები მომდევნო შეხვედრას 13 აგვისტოს ლიეტუვის ნაკრების წინააღმდეგ გამართავენ.
კომენტარები
იყავით პირველი, ვინც დაწერს კომენტარს