გოლი მატჩის დასრულებამდე 7 წამით ადრე | აპოლომ აპოლონ სმირნისი დაამარცხა

საქართველოს ჩემპიონმა წყალბურთში „აპოლომ“ ევროთასის ჯგუფური ეტაპის მეორე შეხვედრა გამართა. „აპოლო“ თბილისში ბერძნულ „აპოლონ სმირნისს“ დაუპირისპირდა და დრამატული მატჩი ბოლო წამებზე მოიგო — 21:20.

პირველი მეოთხედი უკეთ სტუმრებმა ჩაატარეს და 7:4 იმარჯვეს, თუმცა მეორე რვაწუთიან მონაკვეთში უკეთესი „აპოლო“ იყო და შესვენებაზე ანგარიში თანაბარი გახლდათ — 10:10. საქართველოს ჩემპიონმა მესამე მეოთხედი 7:5 მოიგო, თუმცა დასკვნით მეოთხედში სტუმრებმა წონასწორობა აღადგინეს.

გამარჯვებულის ბედი ბოლო წამებზე გადაწყდა. შეხვედრის დასრულებამდე 12 წამით ადრე, 20:20-ზე, „აპოლონ სმირნისმა“ ბურთი დაკარგა. „აპოლომ“ შეტევის ორგანიზება მოასწრო და დმიტრი ალექსეევმა გამარჯვების გოლი სათამაშო დროის დასრულებამდე 7 წამით ადრე გაიტანა.

„აპოლოს“ მხრიდან 5 გოლით სწორედ ალექსეევი გამოირჩა. ვუკ დრასკოვიჩმა და ნიკოლა მოსკოვმა 3-3 ბურთი გაიტანეს. ანდრია ბითაძის, ფილიპ გარდაშევიჩისა და ნემანია ვიკოს ანგარიშზე 2-2 გოლია, ხოლო საბა ტყეშელაშვილმა, სრდან ვუკსანოვიჩმა, დუშან ვაშიჩმა და მატია სლადოვიჩმა თითო-თითო გოლი მიითვალეს.

ცნობისთვის, „აპოლოს“ სამი ქულა აქვს და მეორე პოზიციაზე იმყოფება. პირველ ადგილზე „ბარსელონაა“, რომელიც დღეს თავის შეხვედრას „ტერასას“ წინააღმდეგ გამართავს.