ჩილიჩი დამარცხებულია | ბასილაშვილის გამარჯვება ორ სეტში

ნიკოლოზ ბასილაშვილი ალმათის ღია პირველობის 1/16-ფინალში 2014 წლის US Open-ის გამარჯვებულს, მარინ ჩილიჩს დაუპირისპირდა. ქართველმა ჩოგბურთელმა მეტოქე ორ სეტში დაამარცხა და მერვედფინალის საგზური მოიპოვა.

პირველი სეტი თანაბარ ბრძოლაში დაიწყო და საწყის ოთხ გეიმში ჩოგბურთელებმა ბრეიკები გაცვალეს. 2:2-ზე ბასილაშვილმა ბრეიკპოინტი გამოიყენა, 4:2-ზე კი მეტოქის ჩაწოდებაზე კიდევ ერთი გეიმი მოიგო და სეტის დახურვა არ გასჭირვებია — 6:2.

მეორე სეტის დასაწყისში უპირატესობას ჩილიჩი ფლობდა და ბასილაშვილის ჩაწოდებაზე ბრეიკი შეასრულა. ნიკოლოზმა ანგარიში გაათანაბრა და პარტია ტაიბრეიკისკენ მიდიოდა, თუმცა 5:5-ზე ბასილაშვილმა ბრეიკპოინტი გამოიყენა. მომდევნო გეიმში ჩილიჩს წონასწორობის აღდგენის კარგი შანსი ჰქონდა და მეტოქის ჩაწოდებაზე 40:0-ს იგებდა, თუმცა ბასილაშვილმა ყველა ბრეიკპოინტი მოიგერია და მატჩპოინტი ხელიდან არ გაუშვა — 7:5.

ცნობისთვის, მერვედფინალში ბასილაშვილს არგენტინელი მეტოქე ეყოლება და ფაკუნდო დიას აკოსტას დაუპირისპირდება. ამ წყვილის გამარჯვებული მეოთხედფინალში ადრიან მანარინოზე ან ანდრეი რუბლევზე გავა.