პირველი მედალი მსოფლიოს ჩემპიონატზე - ნინო სამხარაძის წარმატება

სპორტის საჭიდაო სახეობებში ამ ეტაპზე საქართველოს ყველაზე დიდი წარმატებები ძიუდოში აქვს, თუმცა ნელ-ნელა სხვა სახეობის წარმომადგენლებიც იკიდებენ ფეხს სპორტულ არენაზე და ამის დასტური აზერბაიჯანის დედაქალაქ ბაქოში გამართული მსოფლიოს 17-წლამდე ჩემპიონატი იყო თავისუფალი სტილით ჭიდაობაში.

ნინო სამხარაძე, რომელიც 69 კილოგრამ წონით კატეგორიაში ასპარეზობდა, პლანეტის პირველობაზე მერვედფინალიდან ჩაერთო და კანადელი ჰუშონ ჰალი 9:0 დაამარცხა, რასაც მეოთხედფინალში განცდილი მარცხი მოჰყვა, თუმცა დამამშვიდებელ წრეში გადანაცვლებულმა წარმატების მიღწევა მაინც შეძლო. რეპეშაჟის ნახევარფინალში სამხარაძემ ბელარუსი კამილა რუძიანსკოვა 4:0 დაამარცხა, ხოლო ბრინჯაოს მედლისთვის გადამწყვეტ შეხვედრაში ყირგიზ მილანა ულანოვას 2:1 აჯობა.

ცნობისათვის, ნინო სამხარაძე გახდა პირველი ქართველი ქალი, რომელმაც ჭიდაობის მსოფლიოს ჩემპიონატზე ჩვენს ქვეყანას მედალი მოუტანა. აქვე გეტყვით, რომ 2026 წელი მისთვის ფანტასტიურია, რადგან პლანეტის პირველობამდე, ევროპის ჩემპიონატზეც ბრინჯაოს პრიზიორი გახდა.