კალანდაძის და ცხოვრებაძის შედეგიანი მატჩები - საფრანგეთსა და ხორვატიაში

სანაკრებო წარმატებების პარალელურად უკანასკნელ პერიოდში ქართველი ხელბურთელები საკლუბო დონეზეც სათანადოდ ასპარეზობენ და მათი უმეტესობა საკუთარი გუნდის ერთ-ერთ წამყვან მოთამაშედ ითვლება. გასულ შაბათ-კვირასაც რამდენიმე მათგანმა საკმაოდ შედეგიანი მატჩი ჩაატარა, რომელთა შორისაც განსაკუთრებით გამოსარჩევი ეროვნული გუნდის ლიდერების, ნიკოლოზ კალანდაძისა და გიორგი ცხოვრებაძის თამაში იყო.

საფრანგეთის სტარ ლიგის 24-ე ტურში „ექს ან პროვანსი“ საკუთარ დარბაზში „სენ რაფაელთან“ 26:31 დამარცხდა. მასპინძლების ქართველმა ლეგიონერმა ნიკოლოზ კალანდაძემ კი თავი 5 გოლითა და 4 შედეგიანი პასით გამოიჩინა. რაც შეეხება გიორგი ცხოვრებაძეს, ხორვატიის პრემიერლიგის საჩემპიონო ჯგუფში „ზაგრებს“ „ტროგერთან“ 29:25 გამარჯვებაში ის 3 გოლითა და 2 გადაცემით დაეხმარა. მირიან გავაშელიშვილმა კი, პოლონეთის სუპერლიგის 26-ე ტურში „კალიში“ – „ოსტროვიას“ (21:28) შეხვედრაში სტუმართა რიგებში აქტივში 2 გოლი და 4 ასისტი ჩაიწერა.

ცნობისათვის, ამჟამად ტრავმის გამო საკუთარ კლუბებს საქართველოს ნაკრების ერთბაშად ოთხი ხელბურთელი, თეიმურაზ ორჯონიკიძე, ერეკლე არსენაშვილი, გიორგი დიხამინჯია და ზურაბ გოგავა ვერ ეხმარება.