ორი ვერცხლი ბოსფორის თასზე - გურგენიძის და სუპატაშვილის კარგი შედეგი

თურქეთის ქალაქ სტამბულში გამართული ფიგურული ციგურაობის საერთაშორისო ტურნირი ქართველი სპორტსმენებისთვის წარმატებული აღმოჩნდა. ჩვენი ქვეყნის სახელით ხელშესახებ შედეგებს იუნიორებს შორის ინგა გურგენიძემ და კონსტანტინე სუპატაშვილმა მიაღწიეს, რომლებიც ქომაგებმა ზამთრის ახალგაზრდულ ოლიმპიადაზე მაღალ დონეზე გამოსვლით გაიცნეს.

„ბოსფორის თასის“ სახელწოდების მქონე შეჯიბრებაში როგორც გურგენიძე, ასევე სუპატაშვილი ვიცე-ჩემპიონები გახდნენ. ინგამ მოკლე პროგრამაში 62,52 ქულა დააგროვა, თავისუფალ პროგრამაში 111,85-ქულიანი შედეგი აჩვენა და საერთო ჯამში თავი 174,37 ქულას მოუყარა. რაც შეეხება კონსტანტინეს, მოკლე პროგრამაში ნაჩვენები - 60,42, ხოლო თავისუფალში დაფიქსირებული 124,22 ქულით ორი პროგრამის ჯამში 184,64 ქულა მიითვალა და ვერცხლის პრიზიორობა დაიმსახურა.

ცნობისათვის, გურგენიძეს მხოლოდ ფრანგმა სტეფანია გლადკიმ, ხოლო სუპატაშვილს უკრაინელმა იეჰორ კურცევმა აჯობა. საქართველოს სახელით ტურნირზე კიდევ ერთი მოციგურავე აიშა ალახვერდიევა ასპარეზობდა, რომელმაც 28 მონაწილეს შორის მე-11 ადგილი დაიკავა.