გადაუხდელი ალიმენტები და პოლიცია გასახდელში - ინციდენტი კოსტა-რიკა-ნიკარაგუის მატჩის წინ

კონკაკაფის ზონის შესარჩევის მეოთხე ტურში კოსტა-რიკა ნიკარაგუას მასპინძლობდა, მატჩის წინ კი ადგილობრივი პოლიციამ სტუმართა გუნდის გასახდელში შეიჭრა და ერთ-ერთი ნიკარაგუელი ფეხბურთელის დაკავებას ცდილობდა. ამის შესახებ კოსტარიკული გამოცემა CRHoy იტყობინება.

როგორც ირკვევა, საქმე ერთ-ერთი ფეხბურთელის მიერ ალიმენტების გადაუხდელობას უკავშირდება. მისი ვინაობა ოფიციალურად არ სახელდება, თუმცა მედია წერს, რომ საუბარია ფორვარდ ბაირონ ბონილიაზე, რომელმაც კოსტა-რიკას გუნდებს შორის გამართულ პირველ მატჩში გაუტანა (1:1).

ფეხბურთელმა თანხის ნაწილი პოლიციის თანდასწრებით გადაიხადა, მატჩის შემდეგ კი დარჩენილი ნაწილის გადახდის პირობა დადო.

მატჩი კოსტა-რიკამ 4:1 მოიგო და ჯგუფის მეორე ადგილზე გადაინაცვლა, ნიკარაგუის ფეხბურთის ფედერაცია კი მომხდარის ფიფაში გასაჩივრებას გეგმავს.

ნიკარაგუელების მტკიცებით, ისინი კოსტა-რიკაში მატჩამდე 48 საათით ადრე ჩავიდნენ, პოლიციამ კი მათი ფეხბურთელის დაკავება მაინც და მაინც უშუალოდ მატჩის წინ, გასახდელში მოინდომა, „რაც ნაკრების თამაშზე ნეგატიურად აისახა“.