„ეს ქართველი იპოვეს“ | ესპანელი ჟურნალისტი ტაბატაძეზე

იური ტაბატაძე „კადისის“ რიგებში შესანიშნავად ასპარეზობს. ესპანეთის რანგით მეორე დივიზიონის — ლა ლიგა ორის — მეცხრე ტურში „კადისი“ „უესკას“ დაუპირისპირდა და 1:0 იმარჯვა. შეხვედრის ერთადერთი გოლი ქართველი თავდამსხმელის ანგარიშზეა.

„უესკასთან“ გამარჯვებას ესპანელი ჟურნალისტი ანხელ გარსია გამოეხმაურა. COPE-ის გადაცემაში El Partidazo-ში მან „კადისზე“ ისაუბრა და ტაბატაძესთან დაკავშირებით საინტერესო კომენტარი გააკეთა.

„კადისი ძალიან სოლიდური გუნდია. პრაქტიკულად ყველა შეხვედრაში კარს მშრალად ინახავენ და მათთვის 1:0 საკმარისია, რომ სამი ქულა აიღონ. და კიდევ — ეს ქართველი ბიჭი იპოვეს, რომელსაც გოლების გატანა მაშინაც შეუძლია, როცა ტრავმირებული თამაშობს,“ — აღნიშნა გარსიამ.

მოპოვებული გამარჯვების შედეგად „კადისი“ ლა ლიგა 2-ის სატურნირო ცხრილში 18 ქულით გალიდერდა. ესპანურ პრესაში ტაბატაძეს აქებენ და მას „კადისის ქომაგების საფეხბურთო კერპიც“ უწოდეს. ქართველი ფეხბურთელის გუნდი მომდევნო შეხვედრას 20 ოქტომბერს, „ბურგოსთან“ გამართავს.