სტერლინგი: რთული დასაჯერებელია, რომ ეს მერაბის საუკეთესო ვერსია იყო
ალჯამეინ სტრელინგი მერაბ დვალიშვილისა და პიოტრ იანის ბრძოლის შემდეგ, პრესასთან პირველად გამოჩნდა და აღნიშნა, რომ ეს მერაბის საუკეთესო ვერსია არ ყოფილა.
„დიახ, რამდენიმე ტექნიკურად არასწორი რამ გავაკეთეთ. ვფიქრობ, როდესაც ერთად გადავხედავთ და გავაანალიზებთ ბრძოლას, ყველა ერთსა და იმავეს დავინახავთ, შევძლებთ კორექტივების სწრაფად შეტანას და რამდენიმე საბრძოლო სიმულაციის ჩატარებას. მიჭირს დავიჯერო, რომ ეს მერაბის საუკეთესო ვერსია იყო. კულისებში გახურებისას და დილით ვარჯიშის დროსაც კი ის ოდნავ სხვაგვარი იყო. მაგრამ ბრძოლა ბრძოლაა. ზოგჯერ უბრალოდ არ აკეთებ იმას, რისთვისაც ხარ დაპროგრამებული. ჩვენ უბრალოდ გვჭირდება, რომ „მანქანას“ მცირე გადატვირთვა მივცეთ,“
– განუცხადა ამერიკელმა Submission Radio-სთან ინტერვიუში.
სტერლინგმა აღნიშნა, რომ, მისი აზრით, ბრძოლა შეიძლებოდა 3-2 შეფასებულიყო ნებისმიერი მებრძოლის სასარგებლოდ და მიიჩნევს, რომ მერაბის სახეზე მიყენებული ზიანი არ ასახავდა დაპირისპირების მიმდინარეობას.
„არც თავის ყველაზე ცუდ დღეს, არ ვფიქრობ, რომ მერაბი ასე ცუდად გამოიყურებოდა – უბრალოდ სისხლი ყოველთვის ცუდად გამოიყურება, მისი ცხვირი კი დიდი ხანია დაღრეცილია, ეს ყველამ იცის. ასე რომ, როდესაც ცხვირში დარტყმა მიიღო, ნაკვეთი ხელახლა გაიხსნა. მაგრამ ეს ყველაფერი კოსმეტიკაა (ზედაპირული ზიანი) – ამას ვერაფერს უზამ. ის ჯერ კიდევ კარიერის პიკზეა.
მერაბი ძალიან აქტიური იყო დასაწყისში, შემდეგ კი ოდნავ შეანელა ტემპი თეიქდაუნის პირველი მცდელობის შემდეგ – და მეჩვენება, რომ მან ძალიან ბევრი ენერგია დახარჯა. მაგრამ იყო მომენტები, როდესაც იანიც დაღლილი ჩანდა. ჩვენ გვინდოდა, მერაბს ზეწოლა მოემატებინა და კორპუსში მუშაობა დაეწყო – ვიცით, რომ ეს დარტყმები შეიძლება გადამწყვეტი იყოს, მას უკვე დაუგდია ამით მეტოქეები. მას მართლაც „აგურები“ აქვს ხელში. ეს სამწუხაროა, მაგრამ საბოლოოდ, ყველაფერი დამოკიდებული იყო იმაზე, თუ რას ხედავდა მერაბი და როგორ გრძნობდა თავს ოქტაგონში,“
– შეაჯამა სტერლინგმა.
შეგახსენებთ, რომ ლას-ვეგასში UFC 323-ზე გამართული სატიტულო ბრძოლა, ხუთივე რაუნდი გაგრძელდა და რუსი მებრძოლის გამარჯვებით - მსაჯების ერთსულოვანი გადაწყვეტილებით დასრულდა.
