“კრიშტიანუ ამას არ იმსახურებდა“ - მსოფლიო პრესის მწვავე კრიტიკა

რონალდუს საპატივცემულოდ გამართული საღამო პორტუგალიისა და დანიის მატჩის დროს ჟორჟე ჟეზუშის გუნდისთვის კოშმარად იქცა. პორტუგალიამ უეფას ერთა ლიგის შეხვედრა ბრაგაში 1:4 წააგო. ეს მარცხი იმ განსაკუთრებულ ატმოსფეროსაც ჩრდილად დაედო, რომელიც გულშემატკივრებმა მატჩის დაწყებამდე შექმნეს.

კაპიტნის გარეშე დარჩენილი პორტუგალიელი ფეხბურთელები მოედანზე მაისურებით გამოვიდნენ, რომლებზეც „რონალდუ“ და 7 ნომერი იყო გამოსახული. ტრიბუნებზე კი ბანერი გაშალეს წარწერით: „მადლობა, კაპიტანო“. თუმცა, როდესაც ანგარიში პორტუგალიელებისთვის არასასურველი მიმართულებით შეიცვალა, საზეიმო განწყობა სტვენამ და უკმაყოფილებამ ჩაანაცვლა.

მატჩი მსოფლიოს სხვადასხვა ქვეყნის გამოცემების ყურადღების ცენტრში მოექცა. ყველაზე მწვავე შეფასება ესპანურმა AS-მა გამოაქვეყნა და საკმაოდ პირდაპირი სათაური შეარჩია: „კრიშტიანუ ამას არ იმსახურებდა“. გამოცემის აზრით, ფეხბურთელებისა და გულშემატკივრების მხრიდან ლეგენდისადმი გამოხატულ სიმბოლურ პატივისცემას მძიმე მარცხი მოჰყვა — ეს კი ნაკრებისთვის 23 წლის განმავლობაში თავდადებული ფეხბურთელის გაცილების შესაფერისი ფორმა არ ყოფილა.

Marca-მ აღნიშნა, რომ რონალდუს საპატივცემულოდ გამართული საღამო სინამდვილეში დანიის ზეიმად იქცა. ესპანურმა გამოცემამ ყურადღება სტუმართა სრულ უპირატესობასა და ოთხ გოლზე გაამახვილა, რომლებიც მათ იმ საღამოს გაიტანეს, რომელიც რონალდუს უნდა მიძღვნოდა. გაზეთმა შედეგი კრიშტიანუს შემდგომი ეპოქის დასაწყისსაც დაუკავშირა და მას კატასტროფა უწოდა.

კატალონიურმა გამოცემა Sport-მა მსგავსი შეფასება გამოაქვეყნა: „პორტუგალია კრიშტიანუს საპატივცემულოდ გამართულ ცერემონიაზე დამცირდა“. გაზეთმა ყურადღება გაამახვილა კონტრასტზე — ერთი მხრივ, ლეგენდისადმი მიძღვნილ ოფიციალურ ღონისძიებაზე, მეორე მხრივ კი პორტუგალიის ნაკრების სრულ კრახზე. დანიელებმა მეტოქის თითოეული შეცდომა სათავისოდ გამოიყენეს.

იტალიურმა La Gazzetta dello Sport-მა რონალდუს გარეშე პორტუგალიის უსუსურ თამაშზე გაამახვილა ყურადღება და ასეთი სათაური გამოაქვეყნა: „პორტუგალიის ცუდი სახე CR7-ის გარეშე — ჰოილუნდის ბრწყინვალე თამაში და დანიის ოთხი გოლი“. გამოცემამ ისიც აღნიშნა, რომ ჯგუფში ნორვეგიას ჯერ კიდევ აქვს შანსი.

ფრანგულმა L'Equipe-მა მატჩის შეფასება ერთი მკაცრი ფრაზით შეაჯამა: „ახალი ეპოქა — მძიმე მარცხი“. რონალდუს წასვლის შემდეგ პორტუგალიის ნაკრების პირველ გამოცდას ახალი თაობისთვის იმედისმომცემი დასაწყისის ნაცვლად დანიასთან აშკარა კრახი მოჰყვა.

პორტუგალიურმა პრესამ საკუთარ ნაკრებს კრიტიკა არ დააკლო. O Jogo-მ დაწერა, რომ რონალდუსადმი მიძღვნილი საღამო „კოშმარად“ იქცა, A Bola-მ კი იკითხა: „რა დაემართა პორტუგალიას?“ და ბრაგაში განცდილ მარცხს „დამცირება“ უწოდა.

Publico-მ კიდევ უფრო მწარე სათაური შეარჩია: „რონალდუ საპატივცემულო ცერემონიას არ დასწრებია და არც პორტუგალია გამოჩენილა“. ეს იყო მინიშნება როგორც ლეგენდის მოედანზე არყოფნაზე, ისე საკუთარი გულშემატკივრების თვალწინ ნაკრების უსუსურ თამაშზე.

კრიტიკას ბრიტანული გამოცემებიც შეუერთდნენ. BBC Sport-მა შედეგს „პორტუგალიის დამცირება“ უწოდა, The Guardian-მა კი დანიის აშკარა უპირატესობაზე გაამახვილა ყურადღება.

talkSPORT კიდევ უფრო შორს წავიდა და მარცხს ეროვნული ნაკრების ისტორიაში „უპრეცედენტო შეურაცხყოფა“ უწოდა. გამოცემის შეფასებით, ეს პორტუგალიის ყველაზე მძიმე მარცხი იყო საკუთარ მოედანზე გამართულ ოფიციალურ შეხვედრებში.