ეფექტური დაფარებები და ჩატენვა | ბითაძის ორლანდომ NBA-ის თასზე მაიამის მოუგო

გოგა ბითაძის „ორლანდო მეჯიქი“ NBA-ის თასის ნახევარფინალში გავიდა. მეოთხედფინალში ქართველი კალათბურთელის გუნდმა საშინაო არენაზე ითამაშა და 13 ქულით წაგებული პირველი მეოთხედის მიუხედავად, „მაიამი ჰიტი“ დამაჯერებლად, 117:108 დაამარცხა.

ბითაძემ მატჩი სათადარიგოთა სკამზე დაიწყო და პარკეტზე 17 წუთი და 6 წამი გაატარა. გოგამ ორი ეფექტური დაფარება შემოგვთავაზა და მის აქტივში 7 ქულა, 6 მოხსნა და 1 შედეგიანი გადაცემა იყო. ქართველმა ცენტრმა 4-დან 3 ორქულიანი და 1 საჯარიმო ჩააგდო, 6 მოხსნიდან 1 კი მეტოქის ფარზე ჰქონდა.

ბითაძემ ბურთი ორჯერ დაკარგა და ამდენივე ჯარიმა მიიღო, თუმცა როდესაც გოგა პარკეტზე იყო, „ორლანდომ“ „მაიამიზე“ 11-ით მეტი ქულა ჩააგდო, რაც „მეჯიქის“ რიგებში ერთ-ერთი საუკეთესო შედეგი იყო. „ორლანდოს“ შემადგენლობაში ყველაზე მეტი, 37 ქულა, დესმონდ ბეინმა დააგროვა; ჯეილენ საგსს 20 ქულა ჰქონდა, ხოლო პაოლო ბანკეროს — 18.

ცნობისთვის, NBA-ის თასის ნახევარფინალში „ორლანდო“ „ნიუ იორკ ნიქსს“ შეხვდება, რომელმაც სანდრო მამუკელაშვილის „ტორონტო რეპტორსი“ დაამარცხა. მატჩი 14 დეკემბერს გაიმართება.