ენრიკემ კვარა ცვლილებაზე ათამაშა | პსჟ-მ ტულუზა გაანადგურა

საფრანგეთის ლიგა 1-ის მესამე ტურში „ტულუზა’’ შინ პსჟ-სთან 3-6 განადგურდა. მოქმედი ჩემპიონის მხრიდან გოლები ნევეშმა (3), ბარკოლამ და უსმან დემბელემ (2) გაიტანეს. 70-ე წუთზე ტრავმის გამო დემბელე შეცვალეს, მინდორი თავად დატოვა, ამ ეტაპზე ტრავმის სიმძიმე უცნობია.

ლუის ენრიკემ ხვიჩა კვარაცხელია სათადარიგოთა სკამზე დასვა და 63-ე წუთზე თამაშში ჩართო, როცა ანგარიში 1:5 იყო. გასული სეზონის დასკვნითი ნაწილი ქართველი ფეხბურთელისთვის ძალიან დატვირთული იყო და კარგია, რომ ენრიკე დასვენების საშუალებას აძლევს. კვარა საუკეთესო ფორმისგან შორსაა, თუმცა რამდენიმე ეპიზოდის გამოყოფა შეიძლება, 78-ე წუთზე მისმა აქტიურობამ პსჟ-ს შეტევა გაამწვავა და საბოლოოდ ეს შეტევა ნევეშის გოლით დასრულდა. 82-ე წუთზე მის წინააღმდეგ თამაშის წესის დარღვევის გამო არბიტრმა მეტოქის ფეხბურთელს ყვითელი ბარათი უჩვენა.

 

ლიგა 1-ის მიმდინარე სეზონში ხვიჩას სასტარტო 11-ეულში არ უთამაშია. პირველ ტურში პსჟ-მ „ნანტი’’ სტუმრად დაამარცხა, კვარა სკამზე იჯდა და მატჩის მიწურულს ჩაერთო თამაშში (12 წუთი ითამაშა). მეორე ტურში „ანჟესთან’’ შეხვედრა ტრავმის გამო გამოტოვა. დღეს მინდორს დაუბრუნდა და ნახევარი საათი ითამაშა.

ამ მატჩის შემდეგ ხვიჩა საქართველოს ნაკრების შეკრებაზე გაემგზავრება. საქართველოს ეროვნული ნაკრები ფიფას 2026 წლის მსოფლიოს ჩემპიონატის საკვალიფიკაციო ეტაპისთვის მზადებას იწყებს. ვილი სანიოლის გუნდი პირველი სექტემბრიდან თბილისში შეიკრიბება. საქართველოს ნაკრები შესარჩევი ეტაპის საწყის ორ ტურში საკუთარ მოედანზე თურქეთისა (4 სექტემბერი) და ბულგარეთის (7 სექტემბერი) ნაკრებებს უმასპინძლებს.