სანაკრებო მატჩებს გამოტოვებს? კიტეიშვილი ტრავმის გამო შეცვალეს

ავსტრიის ბუნდესლიგის მე-5 ტურში „შტურმმა’’ თანაქალაქელ „გრაცერ აკ’’-ს სტუმრად სამი უპასუხო გოლი გაუტანა.

„შტურმის’’ სასტარტო შემადგენლობაში ოთარ კიტეიშვილმა მხოლოდ პირველი ტაიმი ჩაატარა. როგორც არაერთი ავსტრიული გამოცემა წერს, შესვენებისას ტრავმის გამო მისი შეცვლა გადაწყდა, მეორე ტაიმში არ უთამაშია. ქართველი ფეხბურთელი წვივის ტრავმამ შეაწუხა, თუმცა ამ ეტაპზე უცნობია მოუწევს თუ არა სექტემბრის სანაკრებო მატჩების გამოტოვება.

ავსტრიის ბუნდესლიგის მიმდინარე სეზონში კიტეიშვილმა ოთხ მატჩში 4 გოლი გაიტანა და 1 საგოლე პასი შეასრულა. ავსტრიის თასზე ერთ მატჩში 1 გოლი შეაგდო. რაც შეეხება ჩემპიონთა ლიგას, „შტურმმა'' ფლეი-ოფში ნორვეგიული „ბოდო/გლიმტის'' ბარიერი ვერ დაძლია და ევროპა ლიგაზე ითამაშებს.

შეგახსენებთ, საქართველოს ეროვნული ნაკრები ფიფას 2026 წლის მსოფლიოს ჩემპიონატის საკვალიფიკაციო ეტაპისთვის მზადებას იწყებს. ვილი სანიოლის გუნდი პირველი სექტემბრიდან თბილისში შეიკრიბება. საქართველოს ნაკრები შესარჩევი ეტაპის საწყის ორ ტურში საკუთარ მოედანზე თურქეთისა (4 სექტემბერი) და ბულგარეთის (7 სექტემბერი) ნაკრებებს უმასპინძლებს.