ტებასი: პერესი სუპერლიგიდან გასვლამდე ლაპორტას იცავდა - მას ლა ლიგისთვის ზიანის მიყენება სურს

ლა ლიგის პრეზიდენტმა ხავიერ ტებასმა „ნეგრეირას საქმის“ გამოძიებაში „რეალის“ მონაწილეობაზე ისაუბრა.

შეგახსენებთ, 2023 წელს „ბარსელონასა“ და მის ხელმძღვანელობას ბრალი წაუყენეს ქრთამის მიცემაში ესპანეთის სამეფო ფეხბურთის ფედერაციის (RFEF) მსაჯთა ტექნიკური კომიტეტის (CTA) ყოფილი ვიცე-პრეზიდენტისთვის, ხოსე მარია ენრიკეს ნეგრეირასთვის თანხების გადახდის გამო.

„ისინი ნეგრეირას საქმეს საღეჭი რეზინივით წელავენ. „რეალს“ მიაჩნია, რომ ნეგრეირა თითოეული სტადიონის ყველა მსაჯთა ოთახში იმყოფება, სადაც ისინი თამაშობენ. „რეალს“ შევახსენებ, რომ ჩვენ პროკურატურას უფრო ადრე მივმართეთ, ვიდრე ეს „რეალმა“ გააკეთა.

„რეალის“ პრეზიდენტი ფლორენტინო პერესი RFEF-ის დირექტორთა საბჭოს შემადგენლობაში შედიოდა ნეგრეირას ისტორიის გამოაშკარავებიდან ექვსი თვის განმავლობაში და გენერალურ ასამბლეაზე ის თავისი იმჟამინდელი მეგობრის კლუბს იცავდა, სანამ სუპერლიგაში იმყოფებოდა. როგორც ჩანს, იმ დღეს, როდესაც „ბარსა“ სუპერლიგიდან გამოვიდა, ყველაფერი შეიცვალა.

აუცილებელია მკაფიოდ ითქვას: საფეხბურთო კლუბ „ბარსელონაზე“ მუდმივი თავდასხმები მიუღებელია, რადგან ეს გაჭიანურებული ისტორიაა. „ბარსელონას“ პასუხისმგებლობის დაკისრება მოუწევს, თუ ეს საჭირო გახდება, თუმცა ახლა ის არაფერშია დამნაშავე და სწორედ „რეალი“ ცდილობს პროცესის გაჭიანურებას“,

- განაცხადა ტებასმა.

ტებასი ასევე მიიჩნევს, რომ „რეალისთვის“ ლა ლიგის წარმატებები ხელსაყრელი არ არის.

„ფლორენტინო პერესისა და „რეალის მიზანია, ლა ლიგას არაფერი გამოუვიდეს, რადგან მათ კვლავ სურთ სუპერლიგის შექმნა. პრობლემა ის არის, რომ ჩვენი ლიგა მეტისმეტად კარგად მუშაობს...

მათი საკომუნიკაციო სტრატეგია გვავნებს და ის ფაქტი, რომ ისინი ნეგრეირას საქმეს წელავენ, ამის ნათელი მაგალითია. ჩვენ საქმეს მოსარჩელის სტატუსით შევუერთდით, თუმცა იმის მტკიცება, თითქოს ეს დღემდე ახდენს გავლენას მიმდინარე მსაჯთა გადაწყვეტილებებზე, უბრალოდ მცდარია“,

- განაცხადა ტებასმა.