იბერია 1999-ის გამარჯვება | დინამო ბათუმისა და ტორპედოს უხვგოლიანი ფრე

Crystalbet ეროვნული ლიგის 23-ე ტური „დინამო თბილისისა“ და „გარეჯის“ დაპირისპირებით გაიხსნა. თბილისელები მასპინძლის სტატუსით იყვნენ და ფავორიტებად მოიაზრებოდნენ, მაგრამ ქულები დაკარგეს და მატჩი ფრედ, 0:0 დასრულდა.

Crystalbet ეროვნული ლიგის მოქმედმა ჩემპიონმა, „იბერია 1999“-მა სამი ქულა აიღო და „სამგურალი“ სტუმრად დაამარცხა - 1:0. მატჩის ერთადერთი გოლი 49-ე წუთზე გავიდა და მისი ავტორი ნიკოლოზ დადიანია, რომელმაც ლუკა სილაგაძის გადაცემით ისარგებლა.

სათამაშო დღე ბათუმში დაიხურა, სადაც „დინამო ბათუმი“ „ტორპედოს“ დაუპირისპირდა. შეხვედრა უხვგოლიანი გამოვიდა და სტადიონზე შეკრებილმა გულშემატკივრებმა ოთხი გატანილი გოლი იხილეს - 2:2.

შეხვედრაში ანგარიში მასპინძლებმა გახსნეს. პირველ წუთზე, იმერელთა შეცდომით თორნიკე კირკიტაძემ ისარგებლა და საკუთარი გუნდი დააწინაურა. „ტორპედომ“ ტაიმის ბოლოს ორი ბურთი შეაგდო. 35-ე წუთზე თავი ანდრიჩმა გამოიჩინა, მე-40-ზე - იონსენმა. აჭარლებმა ბოლომდე იბრძოლეს და 82-ე წუთზე, მარას გოლით ქულა აიღეს.