„რთული გასვლითი მატჩი გველოდება“ | მონტელამ საქართველოსთან თამაშზე ისაუბრა

თურქეთის ნაკრების მთავარმა მწვრთნელმა, ვინჩენცო მონტელამ საქართველოსთან გასამართ შეხვედრაზე ისაუბრა. იტალიელმა სპეციალისტმა ინტერვიუ TRT Spor-ს მისცა და აღნიშნა, რომ მის გუნდს მარტივი დაპირისპირება არ ელოდება.

„ჩვენი მიზანია, ყოველი სანაკრებო შეკრებისას საუკეთესო შემადგენლობა გვყავდეს. უაღრესად მოტივირებულნი ვართ და მაქსიმალურად ვემზადებით. ყოველთვის ბევრ ფეხბურთელს ვიძახებთ (28-კაციანი განაცხადი ჰყავთ), რადგან ვცდილობთ, გუნდში იყვნენ მოთამაშეები, რომელთა იმედიც მომავალში გვექნება. გვინდა, მათ გამოცდილება მიიღონ და სანაკრებო ატმოსფერო შეიგრძნონ.

პირველი მატჩი ჩვენთვის ძალიან მნიშვნელოვანია. ძნელი გასვლითი შეხვედრა გველოდება და ობიექტურად, ჩვენი ჯგუფი ერთ-ერთი ყველაზე რთულია.“

შეგახსენებთ, რომ ქართველი ფეხბურთელები შეკრებას პირველ სექტემბერს დაიწყებენ. მსოფლიო ჩემპიონატის საკვალიფიკაციო ეტაპზე საქართველოს ეროვნული ნაკრები მიმდინარე თვეში ორ მატჩს გამართავს თურქეთთან (დინამო არენა, 20:00) და ბულგარეთთან (17:00).