ჩემპიოთა ლიგის წილისყრა, ხვიჩა და დონარუმა | ლუის ენრიკეს პრესკონფერენცია
„პარი სენ-ჟერმენის“ მთავარმა მწვრთნელმა, ლუის ენრიკემ, მატჩისწინა პრესკონფერენცია გამართა. ესპანელი სპეციალისტის გუნდი ლიგა 1-ის მესამე ტურში „ტულუზას“ დაუპირისპირდება, და ჟურნალისტებმა მას ხვიჩა კვარაცხელიას ჯანმრთელობის მდგომარეობაზეც ჰკითხეს.
„რას ფიქრობთ ჩემპიონთა ლიგის წილისყრაზე? უფრო რთული კალენდარია, ვიდრე გასულ სეზონში გქონდათ?“
„იგივეა. სიმართლე გითხრათ, უკეთესი ანალიზის გასაკეთებლად მომდევნო სეზონს დაველოდები და ვნახავ, წილისყრა როგორ ჩაივლის. თუ არაფერი შეიცვალა, გამოდის, რომ კომპიუტერის ღილაკი არ მუშაობს… რა თქმა უნდა, ვხუმრობ. ჩემპიონთა ლიგის ახალი ფორმატი აღმაფრთოვანებელია და ზოგიერთი გუნდისთვის ძალიან კარგია. ყველა მონაწილეს განსხვავებული კალენდარი აქვს და მნიშვნელოვანია, რომ ტოპ-8-ში მოხვდე. ვეცდებით, მაქსიმალური რაოდენობის ქულები ავიღოთ.
გასული სეზონის მსგავსად, შეგვიძლია ვივარაუდოთ, რომ ქულებს დავკარგავთ, რადგან ძალიან მაღალი დონის მეტოქეები გვყავს. როდესაც ბაიერნის, ბარსელონასა და მსგავსი დონის გუნდების წინააღმდეგ თამაშობ, ქულებს აუცილებლად დაკარგავ. არც ერთი მარტივი მეტოქე არ გვეყოლება და ტოპ-8-ში მოხვედრა რთულია. რა თქმა უნდა, ამის გაკეთება შეგვიძლია, მაგრამ უნდა შევეგუოთ, რომ ეს იოლი არ იქნება.“
„სატრანსფერო ფანჯრის ბოლოსკენ გავდივართ და ჯანლუიჯი დონარუმა ისევ გუნდთან ერთად ვარჯიშობს. არის შანსი, რომ პარი სენ-ჟერმენში დარჩეს?“
„არ ვიცი, რა მოხდება. ეს ფეხბურთელზე, კლუბზე და სხვა კლუბებზეა დამოკიდებული. ყველაფერს ჩვეულებრივად გავაგრძელებთ და ვფიქრობ, ჯიჯისთვის საუკეთესო ვარიანტი გამოსავლის პოვნაა. სხვა არაფერი მაქვს სათქმელი.“
„შეგიძლიათ ხვიჩა კვარაცხელიას ჯანმრთელობის მდგომარეობაზე ახალი ინფორმაცია მოგვაწოდოთ?“
„არაფერია სათქმელი. იდეალურ ფიზიკურ კონდიციებშია, ზუსტად ისე, როგორც მე.“
შეგახსენებთ, რომ ჩემპიონთა ლიგაზე „პარი სენ-ჟერმენის“ მეტოქეები „ბაიერნი“, „ბარსელონა“, „ატალანტა“, „ლევერკუზენი“, „ტოტენჰემი“, „სპორტინგი“, „ნიუკასლი“ და „ბილბაო“ არიან. ქართველ ფეხბურთელს კუნთის დისკომფორტი ჰქონდა და „ანჟერთან“ მატჩი გამოტოვა. ხვიჩამ ვარჯიში განაახლა და „ტულუზასთან“ სათამაშოდ მზად არის.
