მომავლის გუნდი - ქართველ ხელბურთელებს ბარსელონას მწვრთნელები ავარჯიშებენ
„მომავლის გუნდი“ - ასეთი სახელწოდება აქვს საქართველოს ხელბურთის ფედერაციის პროექტს, რომელიც სპორტის სამინისტროს მხარდაჭერით ხორციელდება. პროექტის ფარგლებში თბილისში კემპის ჩასატარებლად ესპანელი მწვრთნელები იმყოფებიან, რომელთა ხელმძღვანელობითაც ორჯერადი ვარჯიშები მომდევნო ათი დღის განმავლობაში ჩატარდება.
საწვრთნელ პროცესს პაბლო კამპოსი და ხავიერ სალვადორი კურირებენ, რომელთაც „ბარსელონაში“ მუშაობის გამოცდილება აქვთ. მათი მთავარი მიზანია ახალგაზრდა ქართველ ხელბურთელებს ინდივიდუალური უნარ-ჩვევების გაუმჯობესებაში დაეხმარონ. პროგრამის ფარგლებში თანამედროვე აპარატურის გამოყენებით მოეწყობა სხვადასხვა ტესტები, რის შედეგადაც ახალგაზრდა ხელბურთელების ფიზიკური და ტექნიკური მონაცემები დადგინდება.
საწვრთნელი პროცესის დასრულების შემდეგ სამივე ასაკობრივი ნაკრებიდან 20-20 საუკეთესო მოთამაშე შეირჩევა, რომლებიც ვარჯიშს ესპანელი სპეციალისტების დატოვებული პროგრამით განაგრძობენ.
