„რომამ“ ედინ ჯეკოსთან შეთანხმებას მიაღწია
„Sky Sports“-ის მიერ გავრცელებული ინფორმაციის თანახმად, „რომამ“ „მანჩესტერ სიტის“ თავდამსხმელ ედინ ჯეკოსთან შეთანხმებას მიაღწია. ახლა „მგლებს“ ინგლისურ კლუბთან ფეხბურთელის ტრანსფერის ღირებულებაზე მოუწევთ მოლაპარაკება. პრესაში გავრცელებული ინფორმაციით, "რომა" მზად არის, ბოსნიელი თავდამსხმელის სანაცვლოდ 25 მილიონი ევრო გაიღოს. იტალიელები დასახელებულ თანხაზე მეტს არ გადაიხდიან და ახლა ინგლისელების პასუხს ელოდებიან. იმ შემთხვევაში, თუ ტრანსფერი განხორციელდება, ჯეკო „რომასთან“, სავარაუდოდ, ხუთწლიან ხელშეკრულებას მოაწერს ხელს, წელიწადში კი 4,5 მილიონ ევროს მიიღებს.
გასულ სეზონში ედინ ჯეკომ „მანჩესტერ სიტის“ მაისურით 32 მატჩი ჩაატარა, საიდანაც 6 გოლის და 3 საგოლე გადაცემის გაკეთება მოახერხა.