„პორტუგალიისთვის პასუხი გვაქვს გასაცემი“ - რა ითქვა რუმინეთთან მატჩის შემდეგ

რაგბი ევროპის ჩემპიონატის პლეი-ოფის ნახევარფინალში საქართველოს ნაკრებმა ავჭალის სარაგბო სტადიონზე რუმინეთს უმასპინძლა და 31:7 დაამარცხა.

ამ გამარჯვებით, ბორჯღალოსნებმა პლეი-ოფის ფინალში თამაშის უფლება მოიპოვეს, რომელშიც ტურნირის ჩემპიონობისთვის იბრძოლებენ.

შეხვედრის დასრულების შემდეგ საქართველოს ნაკრების მთავარმა მწვრთნელმა ლევან მაისაშვილმა და კაპიტანმა, მერაბ შარიქაძემ განვლილი მატჩი შეაფასეს.

ლევან მაისაშვილი:

შარშან მეტოქე სათანადოდ ვერ დავაფასეთ და ერთგვარი მოულოდნელობა იყო მათი მხრიდან შეჯგუფებებში: რაქში, მოლსა და შერკინებაში თამაში. რუმინეთი ძალისმიერი რაგბის მიმდევარია და ცდილობს სწორედ აქ მოიპოვოს უპირატესობა. ვფიქრობ, ამჯერად მათ სრულად გავეცით პასუხი და სხვა დანარჩენებთან ერთად, ამ კომპონენტებშიც სრულად ვდომინირებდით. ყველაზე კარგი კი ის იყო, რომ დასახულ გეგმას მივყევით, წელს საუკეთესო თამაში ვაჩვენეთ და დაგვიფასდა ვარჯიშებზე გაწეული შრომა.

გიორგი კვესელაძემ ფეხის უკანა კუნთი დაიზიანა. ტრავმის სიმძიმე დაახლოებით 2 დღის შემდეგ გვეცოდინება, როდესაც ზუსტი დიაგნოზი დადგინდება. ვიმედოვნებ სერიოზული არაფერი იქნება. პორტუგალიასთან მატჩის კვირაში ველოდებით ბექა გორგაძის დაბრუნებას, რომელიც რეაბილიტაციას ასრულებს და მომავალ კვირაში ვარჯიშს განაახლებს.

ფინალში პორტუგალიას ვეთამაშებით, რომელიც რაგბი ევროპის ჩემპიონატზე ჩვენს შემდეგ უდავოდ საუკეთესო გუნდია. ის ესპანეთზეც ძლიერია და რუმინეთზეც, რაც დაამტკიცეს კიდეც. შარშან მათ ორჯერ შევხვდით და არც ერთხელ დავრჩით ბოლომდე კმაყოფილი. იყო მიზეზები – კოვიდ-პანდემია თებერვალში და ენტერო-ვირუსი ზაფხულში. ამიტომ მათთვისაც პასუხი გვაქვს გასაცემი. გარდა ამისა, ეს არის ფინალი, რაც მოტივაციას ასმაგად ზრდის. იმედი მაქვს ფინალისთვის კარგად მოვემზადებით და მსოფლიო თასამდე ყველა დაინახავს, სად არის საქართველო და სად პორტუგალია.

მერაბ შარიქაძე:

რაგბი ზედმეტად გუნდური თამაშია იმისთვის, რომ ვინმეს თავი ყველაზე მაგარი ეგონოს. თუ ზურგს 14 მოთამაშე არ გიმაგრებს, კაპიკია შენი ფასი. არ არსებობს საუკეთესო მოთამაშე, არსებობს საუკეთესო გუნდი. რაც შეეხება ნახევარფინალს და ანთიმოზ ივერიელის თასს, ძალიან მოტივირებულები ვიყავით გვსურდა ის საქართველოში დარჩენილიყო. ამავდროულად, სასწორზე იდო ფინალის საგზური. წინ საინტერესო ფინალი გველის, თუმცა ჩემთვის გაუგებარი მიზეზების გამო, ის ესპანეთში, პორტუგალიის საზღვარზე, ფაქტობრივად პორტუგალიაში იმართება.

რაგბი ევროპის პრეზიდენტმა ფორმატის ცვლილებასთან დაკავშირებით თქვა – ასე იქნებ საქართველოს სადმე ფეხი დაუცდესო, მაგრამ იმედი მაქვს ეს არ მოხდება. როდესაც ექვს ერში არაფერი იცვლება, მე ასეთი ცვლილება უსამართლობად მიმაჩნია, თუმცა ტიტული ასეც უნდა მოვიგოთ.

რაგბი ევროპის ჩემპიონატის ფინალში საქართველოს მორაგბეთა ნაკრების მეტოქე პორტუგალიის ეროვნული გუნდი იქნება. მატჩი 19 მარტს, ესპანეთის ქალაქ ბადახოსში გაიმართება.