როგორ შევაჩეროთ მესის საჯარიმო დარტყმები? "ლეგანესის" თავკაცის საინტერესო პასუხი
კატალონიის „ბარსელონას“ ფეხბურთელი, ლიონელ მესი დიდი ხანია საჯარიმო დარტყმებს ფენომენალურად ასრულებს. არგენტინელმა სუპერვარსკვლავმა „სელტასთან“ მატჩში კიდევ ერთხელ დაამტკიცა, რომ ჯარიმების ოსტატი გახლავთ. „ლა პულგამ" ვიგოელებს ორი თითქმის იდენტური ჯარიმა გაუტანა.
ბუნებრივია მესის ოსტატობის შესახებ მოწინააღმდეგე გუნდის ფეხბურთელებსა და მთავარ მწვრთნელებს ყველაფერი მშვენივრად მოეხსენებათ და მესის მიერ დარტყმულ ჯარიმებს განსაკუთრებით უფრთხიან. გამონაკლისი არც „ბარსელონას“ მომდევნო მეტოქის, „ლეგანესის“ თავკაცი, ხავიერ აგირე გახლავთ.
მექსიკელ სპეციალისტს ერთ-ერთ ესპანურ გადაცემაში, El Larguero-ში სტუმრობისას ჰკითხეს უკეთესი იქნებოდა თუ არა, რომ მესის საჯარიმოების დროს გუნდებს ცოცხალი კედელი არ გამოეყენებინათ, რაზეც აგირემ განაცხადა: “დღეს ეს იდეა ჩემი სამწვრთნელო შტაბის ერთ-ერთმა წევრმაც შემომთავაზა. მე კი ვუპასუხე - მესი საჯარიმო მოედნის გარეთ ივან კუელარის (ლეგანესის მეკარე) პირისპირ რომ დავტოვო და 10 ბურთი მივცე, 11 გოლს გაიტანს".
.jpg)
