მეორე ლელო სეზონში - სუთიძემ კოლომიესთან კარგად ითამაშა

ქართველ მორაგბეთა უმრავლესობა ამჟამად სანაკრებო შეკრებაზე იმყოფება და შესაბამისად, გასულ შაბათ-კვირას საფრანგეთის TOP 14-სა და PRO D2-ში ჩვენი ქვეყნის წარმომადგენლები ნაკლებად იყვნენ საკლუბო რაგბით დაკავებულნი, თუმცა რანგით მეორე დივიზიონის მეათე ტურს ქართული ლელოს გარეშე მაინც არ ჩაუვლია.

„კოლომიემ“ საკუთარ სტადიონზე „ბეზიე“ 34-ქულიანი სხვაობით, 53:19 დაამარცხა და მაშინ, როდესაც სტუმრები 0:32-ს აგებდნენ, მათ შემადგენლობაში პირველი ლელო ნიკოლოზ სუთიძემ დადო. 23 წლის ქართველმა ლეგიონერმა თანაგუნდელების მიერ განვითარებული შეტევა ლოგიკურად დააგვირგვინა და მიმდინარე ჩემპიონატში მეორედ აიღო მეტოქის ჩათვლის მოედანი. ნიკა სასტარტო შემადგენლობაში იყო, 52-ე წუთზე შეცვალეს და მცირე შესვენების შემდეგ, 74-ე წუთზე მოედანზე ისევ დაბრუნდა.

ცნობისათვის, ამავე შეხვედრაში მონაწილეობა კიდევ ერთმა ქართველმა მორაგბემ მიიღო - „ბეზიეს“ რიგებში 52-ე წუთზე ლუკა აზარიაშვილი გამოჩნდა. „კოლომიეს“ სათადარიგოთა შორის იყო მამუკა მსტოიანი, ხოლო სტუმართა მარქაფაში ომარ ოდიშვილი, თუმცა არც ერთი მათგანი მოედანზე არ გამოჩენილა.