დოპინგ სკანდალი ქართულ რაგბიში | WADA-მ გამოძიების შედეგები გამოაქვეყნა

მსოფლიოს ანტი-დოპინგის სააგენტომ, WADA-მ და World Rugby-მ ერთობლივი გამოძიება ჩაატარეს და საქართველოს ნაკრების 6 მოთამაშე და გუნდის პერსონალის ერთი წევრი დოპინგის წესების დარღვევაში არიან მხილებულნი. WADA-მ და World Rugby-მ ოფიციალური განცხადება გაავრცელეს და დაადასტურეს, რომ 2019-დან 2023 წლამდე პერიოდში იყო ხუთი შემთხვევა, როდესაც დოპინგის ნიმუშების ჩანაცვლება მოხდა. გამოვლინდა „ორგანიზებული სქემა“, რომელიც დაკავშირებულია რეკრეაციულ ნარკოტიკებთან და ნიმუშების ჩანაცვლებასთან.

World Rugby-ის განცხადებაში ნათქვამია, რომ დარღვევები არ იყო დაკავშირებული შედეგის გასაუმჯობესებელ დოპინგთან, არამედ ეხებოდა რეკრეაციულ ნარკოტიკებსა და ნიმუშების ჩანაცვლებას, ხოლო ერთობლივი გამოძიების მთავარი ინსტრუმენტები იყო მიზნობრივი ტესტირება და დნმ-ის ანალიზი.

ნიმუშის ჩანაცვლება — ანუ სპორტსმენის შარდის ან სისხლის ნიმუშის სხვა ნიმუშით შეცვლა — ანტი-დოპინგის წესების ძალიან მძიმე დარღვევად ითვლება და WADA-ს აკრძალულ სიაში კლასიფიცირდება, როგორც მეორე დონის დარღვევა. World Rugby-ის მიხედვით, მორაგბეებსა და პერსონალის წევრს ბრალი წარედგინათ და სანქციებიც დაეკისრათ, თუმცა დისციპლინური პროცესი ჯერ დასრულებული არ არის — შვიდივე პირის მიმართ საბოლოო გადაწყვეტილება ჯერ არ გამოქვეყნებულა. Rugby Pass-ის ინფორმაციით, მოთამაშეებმა აპელაცია შეიტანეს და საქმე განხილვის პროცესშია.

WADA-ს პრეზიდენტმა, ვიტოლდ ბანკამ განაცხადა, რომ ქართულ სპორტს შესაძლოა დამატებითი სანქციები დაეკისროს. ამის ფარგლებში WADA-მ უკვე ამოიღო სხვა ქართველი სპორტსმენების ნიმუშებიც სხვადასხვა სპორტიდან.

„რაც ქართულ რაგბიში ხდებოდა, აღმაშფოთებელია და ეს შოკს გამოიწვევს როგორც ქართულ სპორტში და მთავრობაში, ისე მსოფლიო რაგბიში. მინდა, მადლობა გადავუხადო WADA-ს საგამომძიებო გუნდს დაუღალავი და პროფესიონალური ოპერაციის ჩატარებისთვის. ასევე ვაფასებ World Rugby-ის მზადყოფნას, რომ WADA-სთან თანამშრომლობით მიეღწია ამ მნიშვნელოვანი შედეგისთვის. ეს ისტორიის დასასრული არ არის — ახლა გამოძიება ქართულ სპორტში უფრო ღრმად გრძელდება.

WADA-მ გამოძიების შედეგები უკვე მიაწოდა საქართველოს მთავრობას, რათა განიხილონ პრობლემები საქართველოს ანტი-დოპინგურ სააგენტოში. შემდგომი ნაბიჯების განხილვის ფონზე ნათელია, რომ WADA-მ დაკარგა ნდობა GADA-ს ანტი-დოპინგის პროგრამის მიმართ და შესაბამისმა ორგანოებმა მნიშვნელოვანი ცვლილებები უნდა განახორციელონ,“ — განაცხადა ბანკამ.

გამოძიებამ ასევე დაადგინა, რომ დოპინგ-კონტროლის ოფიცრები სპორტსმენებს ტესტირების პროცესში არ აკვირდებოდნენ და არ ესწრებოდნენ შარდის აღებას, რაც წესების აშკარა დარღვევაა.