ხაბიბი: უსმან ნურმაგომედოვი ილიასა და ცარუკიანის დონეზეა

შერეული ორთაბრძოლების ისტორიაში ერთ-ერთმა საუკეთესო მებრძოლმა, ხაბიბ ნურმაგომედოვმა, უპასუხა კითხვას - მიაღწია თუ არა მისმა შეგირდმა, უსმან ნურმაგომედოვმა, UFC-ის საუკეთესო მსუბუქწონოსნების, ილია თოფურიასა და არმან ცარუკიანის დონეს.

მანამდე PFL-ის მსუბუქი წონის ჩემპიონმა განაცხადა, რომ მისთვის თოფურიასნაირი მებრძოლის დამარცხება დიდ სირთულეს არ წარმოადგენს.

„არასწორია UFC-ზე საუბარი, როდესაც PFL-ის მებრძოლი ხარ, თუმცა მე ამ საკითხზე ჩემი აზრი მაქვს. მასთან ერთად თავად ვჭიდაობ, მასთან პირადად ვმუშაობ და ვიცი, რა გზა გაიარა და რამდენად გაიზარდა ერთ წელიწადში. ჩემი გადასახედიდან - მიმაჩნია, რომ უსმანი ძალიან გაიზარდა და ახლა ის, მინიმუმ, UFC-ის საუკეთესო მებრძოლების დონეზეა.

ვფიქრობ, ის უკვე ამ დონეზეა. ერთი წლის წინ რომ გეკითხათ, გეტყოდით, რომ მოცდაა საჭირო, მაგრამ ამ მომენტში ვთვლი, რომ ის მზადაა. ყველაფერს დრო აჩვენებს“,

- განაცხადა ნურმაგომედოვმა Gorilla Fighting-თან ინტერვიუში.

დაუმარცხებელი უსმან ნურმაგომედოვი ოქტაგონს უკვე ამ უქმეებზე, დუბაიში დაგეგმილ PFL-ის ტურნირზე დაუბრუნდება, სადაც საღამოს მთავარ ბრძოლაში საჩემპიონო ქამარს ბრიტანელი ალფი დევისის წინააღმდეგ დაიცავს.

ორგანიზაციის ოფიციალურ რეიტინგში 27 წლის დაღესტნელი მსუბუქწონოსანი საუკეთესო მებრძოლთა (P4P) სიის პირველ საფეხურს იკავებს.