„სისულელეა, კამარუ რამ გაახსენათ“ - რახმონოვი ისლამთან ბრძოლას ითხოვს
რამდენიმე დღის წინ დაღესტანში დაბრუნებულმა ისლამ მახაჩევმა აღნიშნა, რომ მისი მომდევნო მეტოქის ვინაობას UFC-ის ხელმძღვანელები სავარაუდოდ ორი კვირის შემდეგ დაასახელებენ და სანამ ეს ყველაფერი ოფიციალურ სახეს მიიღებს, სპორტულ მედიაში სერიოზული მსჯელობა მიმდინარეობს იმის თაობაზე, თუ ვისთან უნდა დაიცვას პირველად საჩემპიონო ქამარი ქვესაშუალო წონაში ისლამმა. ამის თაობაზე კომენტარი მისმა მწვრთნელმა ხავიერ მენდესმა და ასევე ერთ-ერთმა კონკურენტმა შავკატ რახმონოვმა გააკეთეს, რომელთა მოსაზრებებიც ერთმანეთს რაღა თქმა უნდა არ დაემთხვა.
ხავიერ მენდესი
კამარუ უსმანის შესახებ ბევრი საუბრობს და მასზე ვიტყოდი, რომ კარგი მოჭიდავეა, რომელსაც ასევე სერიოზული დარტყმის ტექნიკა გააჩნია. ვფიქრობ, ამ წონაში პოტენციურად მახაჩევისთვის ის ყველაზე საშიში თუ არა, ერთ-ერთი ყველაზე საშიში მეტოქე მაინც იქნება.
შავკატ რახმონოვი
კამარუს აღარც სპორტული ფორმა და აღარც ასაკი აძლევს იმის საშუალებას, რომ სატიტულო ბრძოლა ჩაატაროს. გარდა ამისა, შედეგებიც არ დაგავიწყდეთ - მას ზედიზედ სამი ბრძოლა აქვს წაგებული და დივიზიონის მეათე ნომერია. ადრეც ვთქვი და ახლაც გავიმეორებ, ამ წონაში ჩემპიონობის ერთადერთი პრეტედენტი მე ვარ.
აღსანიშნავია, რომ შავკატ რახმონოვმა 38 წლის კამარუ უსმანის შედეგების თქმის დროს შეცდომა დაუშვა, რადგან ამ უკანასკნელმა ცოტა ხნის წინ ხოაკინ ბაკლი დაამარცხა, იქამდე კი ზედიზედ სამჯერ, ორჯერ ლეონ ედვარდსთან, ერთხელ კი ხამზატ ჩიმაევთან წააგო.
