„სენტ-ეტიენში კარგად ითამაშა“ | მარსელს ზურიკოს შეძენა ურჩიეს

„მარსელს“ გარემარბის დამატება სურს და მის რადარზე ტიმოთი ვეა და იგორ პაიშაო იმყოფებიან. ფრანგულ კლუბს „იუვენტუსთან“ და „ფეიენოორდთან“ საერთო ენის გამონახვა უჭირს, რის გამოც Top Mercato-მ დაასახელა ოთხი ფეხბურთელი, რომლებზე გადართვაც „მარსელს“ შეუძლია. ერთ-ერთი მათგანი „სენტ-ეტიენის“ ქართველი შემტევი, ზურიკო დავითაშვილია.

„გასულ სეზონში ზურიკო დავითაშვილმა მშვენივრად იასპარეზა და „სენტ-ეტიენის“ მაისურით ჩატარებულ 34 შეხვედრაში 9 გოლი და 8 შედეგიანი გადაცემა მიითვალა. ქართველ ფეხბურთელს ბევრი მსურველი ჰყავს, თუმცა ჯერჯერობით „მწვანეების“ რიგები არ დაუტოვებია — რაც, სავარაუდოდ, კლუბის მიერ მოთხოვნილი 20 მილიონი ევროს გამოა.

მართალია, ზურიკოს ჩემპიონთა ლიგაზე თამაშის დიდი გამოცდილება არ აქვს და შესაძლოა, ჯონათან როუზე უკეთესი გუნდს ვერაფერი შესძინოს, თუმცა არსებობს შანსი, რომ „მარსელმა“ მას ყურადღება მიაქციოს. მიზეზი ისაა, რომ დავითაშვილი ჯერ კიდევ ახალგაზრდაა და გასულ სეზონში, გავარდნილ „სენტ-ეტიენში“, კარგი რაღაცები აჩვენა,“ — წერს ფრანგული გამოცემა.

სასურველია აღვნიშნოთ ისიც, რომ Top Mercato-მ „მარსელს“ ზურიკოს გარდა ლეანდრო ტროსარი, ელის ბენ სეგირი და არმან ლორიენტე ურჩია.