მსოფლიოს საკლუბო ჩემპიონატი | Opta ფავორიტად პარი სენ-ჟერმენს ასახელებს

14 ივნისს, ფიფას მსოფლიო საკლუბო ჩემპიონატი დაიწყება, რომელიც განახლებული ფორმატით ტარდება. ტურნირამდე, ცნობილმა სტატისტიკურმა სააგენტომ, Opta-მ საკუთარი რეიტინგი გამოაქვეყნა და ფავორიტები დაასახელა.

Opta-ს მიხედვით, საკლუბო მსოფლიოს მოგების ყველაზე კარგი შანსი ხვიჩა კვარაცხელიას „პარი სენ-ჟერმენს“ აქვს. ჩემპიონთა ლიგის მოქმედი გამარჯვებულის ტრიუმფის ალბათობა 18.5 პროცენტად ფასდება. მეორე ადგილზე „მანჩესტერ სიტი“ იმყოფება - 17.8 პროცენტი, ხოლო „ბაიერნი“ მესამე ადგილს იკავებს - 12.8 პროცენტი.

„რეკორდმაისტერს“ ჩემპიონთა ლიგის ფინალისტი, „ინტერი“ მოსდევს - 12.3 პროცენტი. ჩაბი ალონსოს „რეალი“ მეხუთე ადგილზეა - 9.8 პროცენტი. „სამეფო კლუბის“ შემდეგ „ჩელსი“ (8.4 პროცენტი), „დორტმუნდი“ (5.4 პროცენტი), „ატლეტიკო“ (5.1 პროცენტი) და „იუვენტუსი“ (3.6 პროცენტი) მოდიან.

ცნობისთვის, კვარაცხელიას „პარი სენ-ჟერმენი“ B ჯგუფშია მოხვედრილი და მისი მეტოქეები „ატლეტიკო“, „ბოტაფოგო“ და „სიეტლ საუნდერსი“ არიან. პარიზელები პირველ შეხვედრას 15 ივნისს გამართავენ და „ატლეტიკოს“ დაუპირისპირდებიან.