დომინანტი ოკლაჰომა | თანდერმა ინდიანასთან სერიაში ანგარიში გაათანაბრა

„ოკლაჰომა სითი თანდერმა“ NBA-ის სუპერფინალურ სერიაში ანგარიში გაათანაბრა. „ოქეისიმ“ მეორე შეხვედრაც საკუთარ კედლებში გამართა და პირველი მატჩისგან განსხვავებით, „ინდიანა პეისერსს“ შანსი არ დაუტოვა.

„თანდერმა“ მატჩი კარგად დაიწყო და პირველი მეოთხედი 26:20 მოიგო. მეორე პერიოდში, „ოკლაჰომას“ უპირატესობა სოლიდური გახდა და დიდ შესვენებაზე, „ოქეისი“ 59:41-ს იგებდა. „ინდიანას“ მეორე ტაიმშიც არაფერი გამოუვიდა და „პეისერსი“ 107:123 დამარცხდა.

„თანდერის“ რიგებში საუკეთესო შეი გილჯეს-ალექსანდერი იყო - 34 ქულა, 5 მოხსნა, 8 შედეგიანი გადაცემა. ალექს კარუსომ 20 ქულა დააგროვა. ჯეილენ უილიამსმა 19 ქულა მიითვალა, ხოლო აარონ უიგინსმა - 18. „ინდიანას“ მხრიდან 17 ქულით ტაირიზ ჰალიბერტონი გამოირჩა. პასკალ სიაკამმა 15 ქულა გააკეთა, მაილს ტერნერმა - 16.

ცნობისთვის, ოკლაჰომაში გამართული ორი მატჩის შემდეგ, სერია ინდიანაში გადაინაცვლებს. „პეისერსი“ მასპინძლის რანგში იქნება და „თანდერს“ 12 ივნისს მიიღებს.