მარკ კოულმანის გმირობა | MMA-ის ლეგენდა, რომელმაც მშობლები სიკვდილს გადაარჩინა
მარკ კოულმანი UFC-ის მძიმე წონითი დივიზიონის პირველი ჩემპიონია. მან მსოფლიოს ყველაზე პრესტიჟული ორგანიზაციის ისტორიაში დიდი კვალი დატოვა და 2008 წელს, UFC-ის დიდების დარბაზში შეიყვანეს. კოულმანს კარიერაში ბევრი გამორჩეული მომენტი ჰქონია და ახლახან, მსოფლიოს ყურადღება კიდევ ერთხელ მიიპყრო. განსხვავება ისაა, რომ ამჯერად, ყველაფერი კინაღამ მისთვის ფატალურად დასრულდა...
This is what's left of the house Mark Coleman and his family were in last night.
— Jonathan Snowden (@JESnowden) March 12, 2024
Mark's dog Hammer woke him up to a house in flames. He saved both his parents and is fighting for his life. pic.twitter.com/hicYhv7SDm
კოულმანი მშობლებს სტუმრობდა, როცა მათ სახლს ცეცხლი გაუჩნდა. სახანძრო დეპარტამენტის მიხედვით, ხანძრის კერა სამზარეულოში იყო და ყველაფერი მაშინ დაიწყო, როცა მარკს ეძინა. ის როტვეილერის ჯიშის ძაღლმა, „ჰამერმა“ გააღვიძა. კოულმანს ბევრი არ უფიქრია და მშობლები ცეცხლმოკიდებული სახლიდან უსაფრთხოდ გაიყვანა, რის შემდეგაც, უკან დაბრუნდა, რათა „ჰამერი“ გადაერჩინა, მაგრამ არაფერი გამოუვიდა... კოულმანმა სხვადასხვა სახის დაზიანება მიიღო და კვამლით მოიწამლა, რის გამოც მისი საავადმყოფოში გადაყვანა გახდა საჭირო. მარკი კრიტიკულ მდგომარეობაში იმყოფებოდა და ხელოვნური სუნთქვის აპარატზე იყო შეერთებული.
„ჩვენი მამა ყოველთვის ჩვენი გმირი იყო და უძვირფასესი ადამიანია. ის მებრძოლი იყო და ყოველთვის ასე იქნება. ის ყველაზე ძლიერი და მამაცი ადამიანია მათ შორის, ვისაც ვიცნობ და ახლა სიკვდილს ებრძვის. გთხოვთ, მისთვის და ჩვენი ოჯახისთვის ილოცოთ“, - დაწერა მომხდარიდან რამდენიმე საათის შემდეგ, კოულმანის შვილმა, მორგანმა სოციალურ ქსელში.
Former UFC champion Mark Coleman ran into a burning house and saved both his parents, then went back in for their dog but passed out in the fire
— Dexerto (@Dexerto) March 12, 2024
He is now in critical condition at the hospital pic.twitter.com/BVjC0OHOQ5
MMA-ის ლეგენდამ ბოლომდე იბრძოლა და მძიმე მდგომარეობიდან გამოვიდა. მოგვიანებით, მან მომხდარზე ისაუბრა და განაცხადა: „მადლიერი ვარ იმის გამო, რომ ახლა აქ ვიმყოფები. მსოფლიოში ერთ-ერთი ყველაზე იღბლიანი ადამიანი ვარ. ჩემი ფილტვები საშინელ მდგომარეობაშია, თვალები დამწვარი მაქვს, მაგრამ ცოცხალი ვარ და თავს კარგად ვგრძნობ.
როცა გამეღვიძა და კართან მივედი, სახლში უკვე საშინელი ვითარება იყო და ვერ ვსუნთქავდი. არ მჯერა, რომ ჩემი მშობლები გამოვიყვანე და ძალიან ვწუხვარ, რომ ჰამერი ვერ გადავარჩინე. მადლობა უდიდესი მხარდაჭერისთვის. ნეტავ, თითოეულ თქვენგანთან ჩახუტება შემეძლოს“, - განაცხადა კოულმანმა საავადმყოფოს დატოვების შემდეგ.
Former UFC champion, Mark Coleman, who saved his family from house fire, is responsive after waking up in the hospital pic.twitter.com/wPyU3VpVcu
— Historic Vids (@historyinmemes) March 17, 2024
საშინელი ინციდენტიდან რამდენიმე დღის შემდეგ, 59 წლის მებრძოლი სპორტდარბაზში დაბრუნდა და ვარჯიშიც განაახლა.
