მოგებათა სერია შეწყდა - დინამომ იადრანთან წააგო
წყალბურთის ჩემპიონთა ლიგის მორიგ ტურში თბილისის „დინამომ“ „იადრანს“ უმასპინძლა და სამწუხაროდ 7:12 დამარცხდა.
აღსანიშნავია, რომ თითქმის მთელი მატჩის განმავლობაში ხორვატები აქტიურობდნენ, რაც მეოთხედების ანგარიშშიც აისახა.
პირველი მეოთხედი „იადრანმა“ 4:2 მოიგო, მეორე 4:1 და სტუმრები შესვენებაზე დამაჯერებელი ანგარიშით 8:3 გავიდნენ.
მესამე პერიოდში მასპინძლებმა უკეთ ითამაშეს, მაგრამ 1:2 დამარცხდნენ, ხოლო ბოლო მეოთხედში „დინამომ“ 3:2 მოიგო, თუმცა საბოლოო ჯამში, როგორც უკვე მოგახსენეთ 7:12 დამარცხდა.
თბილისური კლუბიდან გოლები ტყეშელაშვილმა(3), პიეშივაცმა(2), ახვლედიანმა და იმნაიშვილმა გაიტანეს.
შეგახსენებთ, რომ წყალბურთის ჩემპიონთა ლიგაზე „დინამომ“ დღევანდელ დაპირისპირებამდე ორი მატჩი მოიგო. ჯერ „ჰანოვერი“ 10:8 დაამარცხა, ხოლო შემდეგ „რადნიჩკი“ 13:8. ცნობისთვის, სტანოევიჩის გუნდი სატურნირო ცხრილში 6 ქულით ბოლოსწინა ადგილზეა.