„იანი მერაბზე უკეთესი მებრძოლია“ | მოკაევის უცნაური განცხადება

UFC-ის მებრძოლმა, მუჰამედ მოკაევმა პიოტრ იანისა და მერაბ დვალიშვილის ჩხუბზე ისაუბრა. მოკაევმა უცნაური განცხადება გააკეთა და მისი თქმით, დომინანტური გამარჯვების მიუხედავად, „მანქანა“ იანზე უკეთესი მებრძოლი მაინც არაა.

„ვიღაცები ამბობენ, რომ პიოტრი დაღესტანში უნდა წასულიყო, რათა მერაბის ჭიდაობისთვის სათანადოდ მომზადებულიყო. ტაილანდშიც კარგი პირობები იყო, თუმცა უნდა აღვნიშნოთ, რომ ჭიდაობის მწვრთნელი არ ჰყოლია. პიოტრის სპარინგებს ვუყურებდი და ის კარგად გამოიყურებოდა.

არის თუ არა მერაბი იანზე უკეთესი მებრძოლი? უბრალოდ მერაბი უფრო დამუხტული და მოტივირებული იყო. მებრძოლთა დონეს რაც შეეხება, ვფიქრობ, იანი მაინც დვალიშვილზე მაღლა დგას. მერაბის მთავარი პლუსი ჭიდაობაში ტრანზაქციაა და სხვა კომპონენტებს თუ ავიღებთ, იანი მას ბევრად სჯობს. სტრაიკინგზე ხომ საუბარიც ზედმეტია. მერაბთან ჩხუბისას პიოტრმა ვერ გამოიღვიძა და მოტივაცია აკლდა. არის დღეები, როცა მებრძოლებში ცეცხლის დანახვა შეიძლება, არის დღეები, როცა ასე არ ხდება. აშშ-ში ცოტათი გვიან გაფრინდა და პრობლემები ამანაც განაპირობა“.

შეგახსენებთ, რომ გუშინ, აზერბაიჯანელმა მებრძოლმა, რაფაელ ფიზიევმა განაცხადა, რომ პიოტრი ოქტაგონზე 2 სერიოზული ტრავმით გავიდა და დვალიშვილის წინააღმდეგ ბრძოლისას ჯანმრთელობის პრობლემები ჰქონდა.