რუსეთის მხარდამჭერი შეძახილები - ჯოკოვიჩის მამა სკანდალში ეხვევა

ტიტულოვანი სერბი ჩოგბურთელი, ნოვაკ ჯოკოვიჩი და მისი უახლოესი გარემოცვა სკანდალში ეხვევა. გუშინ მოგახსენეთ, რომ ნოვაკისა და რუსი ანდრეი რუბლიოვის მეოთხედფინალურმა დაპირისპირებამ ყურადღება სხვა მხრივაც მიიღო.

კერძოდ, შეხვედრის მიმდინარეობისას, მატჩის მასპინძელი არენის მიმდებარე ტერიტორიაზე ჯოკოვიჩის გულშემატკივრები რუსეთისა და ვლადიმირ პუტინის მხარდამჭერ განცხადებებს სკანდირებდნენ, რის გამოც პოლიციამ 4 პიროვნება დააკავა. დღეს კი ირკვევა, რომ მხარდამჭერებს შორის 33 წლის ჩოგბურთელის მამა, სრჯან ჯოკოვიჩის იყო.

სოციალურ ქსელში ვრცელდება ვიდეო, რომელშიც ისმის უფროსი ჯოკოვიჩის შეძახილი - „გაუმარჯოს რუსეთს“, მის გვერდით კი დგას მამაკაცი, რომელსაც მაისურზე აწერია - „სადაც ჩვენ ვართ, იქ არის რუსეთი“, ამ მაისურზე კი ასო Z არის გამოსახული.

დაკავებულთა შორის ჩოგბურთელის მამა არ არის, თუმცა ამ ფაქტს დაუყონებლივი რეაგირება მოყვა ავსტრალიის ღია პირველობის ორგანიზატორების მხრიდან და ტურნირის ხელმძღვანელებმა ნოვაკ ჯოკოვიჩის გუნდის წევრებს ოფიციალური მოთხოვნა გაუგზავნეს, რომ პოლიტიკური განცხადებები შეზღუდონ.

ცნობისთვის, ხვალ ნოვაკ ჯოკოვიჩი ავსტალიის ღია პირველობის ნახევარფინალში იასპარეზებს, მისი მეტოქე კი ამერიკელი ტომი პოლი იქნება.