„დამწუხრებული და იმედგაცრუებული ვარ“ | სინერი Us Open-ზე ვერ ითამაშებს

მსოფლიოს პირველი ჩოგანი, იანიკ სინერი US Open-ს გამოტოვებს. იტალიელმა ჩოგბურთელმა სოციალურ ქსელში განცხადება გაავრცელა და გულშემატკივრებს აუწყა, რომ აშშ-ის დიდი სლემის ტურნირზე ვერ იასპარეზებს.

„მიუხედავად იმისა, რომ ჩემს გუნდთან და სამედიცინო შტაბთან ერთად ბევრს ვმუშაობდი, მივიღეთ რთული გადაწყვეტილება და US Open-ის წლევანდელ გათამაშებაში მონაწილეობას ვერ მივიღებ. მონტე-კარლოში კორტზე დავბრუნდი და გავაანალიზე, რომ მარჯვენა მუხლის პრობლემების გამო უფრო მეტი დრო მჭირდება.

რა თქმა უნდა, ძალიან დამწუხრებული და იმედგაცრუებული ვარ, რადგან ნიუ-იორკს ჩემს გულში განსაკუთრებული ადგილი უკავია. US Open-ის კორტზე დაბრუნებასა და საოცარ ატმოსფეროში, შესანიშნავი გულშემატკივრების წინაშე თამაშს მოუთმენლად ველოდებოდი“, — განაცხადა სინერმა.

იტალიელი ჩოგბურთელის არყოფნაში დიდი სლემის ტურნირის მთავარი ფავორიტი კარლოს ალკარასი იქნება. ესპანელი ჩოგბურთელი ტრავმას ებრძოდა, თუმცა, როგორც ბოლო დღეებში გაირკვა, თავს კარგად გრძნობს და სათამაშოდ მზად არის. აშშ-ის ღია პირველობა 23 აგვისტოს დაიწყება.

სინერს US Open ერთხელ, 2024 წელს აქვს მოგებული. შარშან იტალიელი ჩოგბურთელი ფინალში გავიდა და ალკარასთან დამარცხდა.