ახალი დარბაზი - ყიზილაჯლოში სპორტული კომპლექსი გაიხსნა

„სოკარს“ გამორჩეული სოციალური პასუხისმგებლობა აქვს; განხორციელებული აქვს ძალიან ბევრი სოციალური მნიშვნელობის პროექტი ჩვენი მოსახლეობისთვის სხვადასხვა რეგიონში და დღევანდელი დღე არის სწორედ ამის დადასტურება, - ამის შესახებ საქართველოს პრემიერ-მინისტრმა ირაკლი ღარიბაშვილმა, მარნეულის მუნიციპალიტეტის სოფელ ყიზილაჯლოში, ახალი სპორტკომპლექსის გახსნის ღონისძიებაზე სიტყვით გამოსვლისას განაცხადა.

მთავრობის მეთაურმა ხაზი გაუსვა „სოკარის“ ინვესტიციების მნიშვნელობას საქართველოსთვის და აღნიშნა, რომ კომპანიას ასობით მილიონი დოლარის ინვესტიცია აქვს განხორციელებული საქართველოში და ქვეყანაში მნიშვნელოვან საქმიანობას ეწევა.

„ჩემთვის დიდი პატივია დღეს აქ ყოფნა. მე მინდა, ჩვენს განსაკუთრებულ სტუმარს მადლობა გადავუხადო ჩამობრძანებისთვის. ბატონი როვნაგ აბდულაევი არის ჩვენი ქვეყნის მეგობარი. იგი წარმოადგენს კომპანია „სოკარს“, რომელიც არის ერთ-ერთი ყველაზე მსხვილი ინვესტორი ჩვენს ქვეყანაში. „სოკარს“ ასეულობით მილიონი დოლარის ინვესტიცია აქვს განხორციელებული საქართველოში და ეწევა ძალიან მნიშვნელოვან საქმიანობას ჩვენს ქვეყანაში. ამავდროულად, მინდა აღვნიშნო, რომ „სოკარს“ გამორჩეული სოციალური პასუხისმგებლობა აქვს. განხორციელებული აქვს ძალიან ბევრი სოციალური მნიშვნელობის პროექტი ჩვენი მოსახლეობისთვის სხვადასხვა რეგიონში და დღევანდელი დღე არის სწორედ ამის დადასტურება. ჩვენ ვიმყოფებით მარნეულის მუნიციპალიტეტში, სოფელ ყიზილაჯლოში და ჩვენ ამ მნიშვნელოვან, ლამაზ საჩუქარს გავხსნით დღეს ოფიციალურად. ეს არის საჩუქარი ადგილობრივი მოსახლეობისთვის - თანამედროვე ევროპული სტანდარტების სპორტული კომპლექსი, რომელიც ჩვენი ახალგაზრდებისთვის ძალიან ძვირფასი საჩუქარი იქნება, ამიტომ, კიდევ ერთხელ დიდი მადლობა ბატონ როვნაგს და კომპანია „სოკარს“. რა თქმა უნდა, ჩვენ დაინტერესებული ვართ, რომ ახალგაზრდობაში ჯანსაღი ცხოვრების წესი წავახალისოთ და ეს ძალიან მნიშვნელოვანი შენაძენია. ამას გარდა, მინდა ჩვენს მოსახლეობას, ხალხს ვუთხრა, რომ დღეს ბატონი როვნაგი გახსნის მათი დაფინანსებით სოფელ კაბალში აშენებულ საბავშვო ბაღს. სულ რაღაც ერთი წელია, ამ მნიშვნელოვანი პროექტის განხორციელება დაიწყო და დღეს უკვე ვხედავთ, რომ მზად არის. პროექტი 3 მლნ ლარი დაჯდა. ასე, რომ ეს არის ძალიან კარგი მაგალითი ჩვენი ძმობის, მეგობრობის და ურთიერთთანამშრომლობის. ჩვენი აზერბაიჯანელი ძმები და აზერბაიჯანის სახელმწიფო ჩვენთვის მხოლოდ მეზობელი ქვეყანა არ არის. მე ყოველთვის ვამბობ, რომ აზერბაიჯანი და აზერბაიჯანელები არიან ჩვენი ძმები და ჩვენ გვაქვს ბრწყინვალე ურთიერთობა. ჩვენ ვართ სტრატეგიული პარტნიორები, ვახორციელებთ ძალიან მნიშვნელოვან პროექტებს. „სოკართან“ ერთად, საქართველოს მთავრობა ახორციელებს უპრეცედენტო მასშტაბის გაზიფიცირების სამუშაოებს მთელი ქვეყნის მასშტაბით და ჩვენი თანამშრომლობა ძალიან ნაყოფიერია“, - განაცხადა ირაკლი ღარიბაშვილმა.

სპორტკომპლექსის გახსნის ღონისძიებაზე შეკრებილ სტუმრებს სიტყვით მიმართა კომპანია „სოკარის“ პრეზიდენტმა. როვნაგ აბდულაევმა პრემიერ-მინისტრ ირაკლი ღარიბაშვილს და ყიზილაჯლოს მოსახლეობას აზერბაიჯანის რესპუბლიკის პრეზიდენტ ილჰამ ალიევის მოკითხვა გადასცა და აღნიშნა, რომ საქართველოს მთავრობის მიერ აზერბაიჯანისთვის შექმნილი პირობების შედეგია ის, რომ აზერბაიჯანმა საქართველოში მილიარდ 200 მილიონის მოცულობის ინვესტიცია განახორციელა. მისი შეფასებით, აზერბაიჯანის და საქართველოს მთავრობების მეგობრობა და ერთობა დღემდე არნახულ დონეზეა აყვანილი და სტრატეგიულ და სხვა ფაქტორებშიც ორ ქვეყანას მნიშვნელოვანი თანამშრომლობა აკავშირებს. როგორც „სოკარის“ პრეზიდენტმა აღნიშნა, საქართველოში გაზიფიცირების დონე 90%-ია და აღნიშნული შედეგის მიღწევა, რომელიც მსოფლიოს მხოლოდ რამდენიმე ქვეყანაში ფიქსირდება, საქართველოს მთავრობის აქტიური ხელშეწყობით გახდა შესაძლებელი.

მარნეულის სოფელ ყიზილაჯლოში სპორტული კომპლექსი „სოკარ ენერჯი ჯორჯიამ“ ააშენა და სახელმწიფოს უსასყიდლოდ გადასცა.

კომპლექსი წარმოადგენს დახურულ მულტიფუნქციურ სპორტულ სივრცეს სხვადასხვა სახეობებისათვის, როგორიცაა კალათბურთი, მინი-ფეხბურთი, ხელბურთი, ფრენბურთი და ჭიდაობა. სპორტულ კომპლექსში განთავსდება ტრიბუნები მაყურებელთათვის, გასახდელები, საშხაპე და სანიტარული ფართები, ინვენტარის შესანახი საწყობი და ადმინისტრაციული სივრცე. შენობის ჯამური ფართი 1157 კვადრატული მეტრია. პროექტის ღირებულება 3 მილიონ ლარზე მეტს შეადგენს. სპორტული კომპლექსის მიმდებარედ „სოკარმა“ სრული რეაბილიტაცია ჩაუტარა საფეხბურთო სტადიონს.

ღონისძიებას სოფელ ყიზილაჯლოში „სოკარის“ პრეზიდენტი როვნაგ აბდულაევი, „სოკარ ენერჯი ჯორჯიას“ გენერალური დირექტორი მაჰირ მამედოვი, აზერბაიჯანის ელჩი საქართველოში ფაიგ გულიევი, საქართველოს აღმასრულებელი და საკანონმდებლო ხელისუფლების წევრები და სახელმწიფო რწმუნებული ქვემო ქართლის მხარეში შოთა რეხვიაშვილი დაესწრნენ.

შემოუერთდით ჩვენს Facebook ჯგუფს საგოლე გადაცემა