პოს ქართველებმა მოაგებინეს - ახალაძე კლერმონს დაეხმარა

საფრანგეთის სარაგბო ჩემპიონატის უმაღლესი ლიგის რეგულარული გათამაშების მეოთხე ტურში სამი ქართული ლელო ვიხილეთ და აქედან ორი ერთ შეხვედრაში და ერთი გუნდის შემადგენლობაში. საუბარი გვაქვს „პო“ - „ლა როშელის“ (39:17) მატჩზე, სადაც მასპინძლების რიგებში მეტოქის ჩათვლის მოედანი ჯერ ლექსო ყაულაშვილმა, ხოლო შემდეგ საქართველოს ნაკრების კაპიტანმა ბექა გორგაძემ აიღო. ყაულაშვილი ძირითად შემადგენლობაში იყო და 41-ე წუთზე შეცვალეს, ხოლო გორგაძემ სრულად იასპარეზა. რაც შეეხება სტუმართა გუნდს, სასტარტოში დაიწყეს ნიკოლოზ სუთიძემ და ალექსანდრე ქუნთელიამ და ორივე მათგანი მთავარმა მწვრთნელმა 48-ე წუთზე შეცვალა.

კიდევ ერთი თამაში, სადაც ქართველმა მორაგბემ თავი გამოიჩინა, „კლერმონი“ - „კასტრი“ (20:6) გახლდათ, სადაც მასპინძლების რიგებში ლელო პირველმა ნომერმა გიორგი ახალაძემ დადო. ეს უკანასკნელი 52-ე წუთზე შეცვალეს, ხოლო გიორგი ძმანაშვილი „კლერმონის“ რიგებში 52-ე წუთზე შევიდა. რაც შეეხება „კასტრს“, ვეტერანი მორაგბე ლევან ჩილაჩავა თავიდანვე საქმეში იყო ჩართული, 41-ე წუთზე დასვენების საშუალება მიეცა და 71-ეზე ისევ მოედანს დაუბრუნდა.

ცნობისათვის, საფრანგეთის TOP 14-ის სატურნირო ცხრილში ოთხი ტურის შემდეგ „პო“ 14 ქულით მესამე ადგილზეა და ლიდერ „ტულუზას“ ქულით ჩამორჩება. რაც შეეხება „კლერმონს“, 10 ქულით მეექვსე პოზიციას იკავებს.