„მუქარა, ზეწოლა, ოჯახური ძალადობის ცრუ ბრალდებები“ | ილიას პოსტი სოციალურ ქსელში
UFC-ის მსუბუქი წონითი დივიზიონის ჩემპიონმა, ილია თოფურიამ „ინსტაგრამის“ საკუთარ გვერდზე პოსტი გამოაქვეყნა. „ელ მატადორი“ პირად ცხოვრებაში შექმნილ მდგომარეობას შეეხო და სკანდალური განცხადება გააკეთა.
„ბოლო რამდენიმე კვირის განმავლობაში მივიღე რთული გადაწყვეტილება, რომ საჩემპიონო ქამრის დაცვისგან პაუზა ავიღო. ეს არჩევანი მარტივი ნამდვილად არ ყოფილა, თუმცა როდესაც ჩნდება გარემოებები, რომლებიც საფრთხეს უქმნიან შენს ღირსებას, ოჯახსა და რეპუტაციას, ამ დროს აუცილებელი ხდება მათთან უშუალოდ გამკლავება.
ბოლო თვეების განმავლობაში ჩემზე განხორციელდა მძიმე და კატეგორიულად მიუღებელი ზეწოლა. მათ შორის იყო მუქარები, რომ ფინანსური მოთხოვნების დაუკმაყოფილებლობის შემთხვევაში გავრცელდებოდა ოჯახური ძალადობის ცრუ ბრალდებები, რომლებიც სრულიად უსაფუძვლოა. სიმართლე არის ის, რასაც მტკიცებულებები ამტკიცებენ და არა ის, რასაც ვინმე შეიძლება ფიქრობდეს.
ყველა შესაბამისი მტკიცებულება ყურადღებით არის დაცული და დოკუმენტირებული. მათ შორისაა აუდიოჩანაწერები, წერილობითი კომუნიკაცია, მოწმეთა ჩვენებები და ვიდეომასალები. აღნიშნული მტკიცებულებები გადაეცა შესაბამის ორგანოებს, რათა დაწყებულიყო სამართლებრივი პროცესი გამოძალვის მცდელობის, მტკიცებულებების გაყალბების, ფინანსური და პირადი ქონების მითვისებისა და მუქარის ფაქტებზე.
ჩემი თავდაპირველი გადაწყვეტილება დუმილის შენარჩუნების შესახებ მიღებული იყო მხოლოდ ჩემი შვილების დასაცავად, რომლებიც ჩემი ცხოვრების უმნიშვნელოვანესი ნაწილი არიან. თუმცა მივხვდი, რომ ასეთ ვითარებაში დუმილი სიმართლეს არ იცავს — ის ცრუ ნარატივებს გავრცელების საშუალებას აძლევს.
ბევრ ადამიანს გამოუცდია მსგავსი სიტუაცია და სამართლებრივმა სისტემამ გაარკვია, რეალური ფაქტები როგორია და რას წარმოადგენს სიმართლე. დღეს ამ ნაბიჯს ვდგამ არა მხოლოდ ჩემი ოჯახისა და საკუთარი თავის გამო, არამედ იმის საჩვენებლადაც, რომ არავინ არაფერი უნდა დათმოს დაშინების, მანიპულაციის ან შიშის გამო. ვინც მე მიცნობს, შეუძლია დაადასტუროს, რომ არასოდეს მიმიმართავს ძალადობის რაიმე ფორმისთვის და რომ ჩემი ცხოვრება და კარიერა ყოველთვის დაფუძნებული იყო დისციპლინაზე, პატივისცემასა და კეთილსინდისიერებაზე.
მე სასამართლო პროცესის მიმართ სრული ნდობა მაქვს და მივცემ სამართლებრივ სისტემას საშუალებას, მტკიცებულებებზე დაყრდნობით ფაქტები დაადგინოს. ჩემი შვილებისა და მიმდინარე სამართლებრივი პროცესებისადმი პატივისცემის გამო, დამატებით საჯარო განცხადებებს აღარ გავაკეთებ. თავაზიანად გთხოვთ, თავი შეიკავოთ სპეკულაციებისგან და პატივი სცეთ ჩემი ოჯახის პირად სივრცეს ამ სენსიტიურ პერიოდში. სიმართლეს ხმამაღლა ყვირილი არ სჭირდება — მას ფაქტები სჭირდება. გმადლობთ, ილია თოფურია.“
შეგახსენებთ, რომ „ელ მატადორს“ ოჯახური პრობლემები აქვს. ილიასა და ჯორჯინა უსკატეგი ბადელის ურთიერთობა ცუდად დამთავრდა და პირადი საკითხების გამო, თოფურიას პაუზის აღება მოუწია.
View this post on Instagram
