30 წლამდე ასაკის საუკეთესო მებრძოლები | ESPN-ის რეიტინგში პირველი ილია თოფურიაა

ESPN-მა 30 წლამდე ასაკის საუკეთესო MMA მებრძოლები დაასახელა. რეიტინგის პირველ ადგილს ქართველი მებრძოლი იკავებს და ავტორიტეტულმა სატელევიზიო არხმა UFC-ის მსუბუქი წონითი დივიზიონის ჩემპიონი, ილია თოფურია გამოარჩია.

ილია თოფურია – პოტენციალი: 10/10. მომენტუმი: 10/10. ვარსკვლავური სტატუსი: 10/10.

„ნებისმიერ ეპოქაში, MMA-ში არსებობს მოკლე სია მებრძოლებისა, რომელთა გარშემოც ყველაფერი ტრიალებს. ეს მებრძოლები განსაზღვრავენ, როგორი იქნება სპორტული კალენდარი და რამხელა ინტერესი გაუჩნდებათ გულშემატკივრებს. ილია თოფურია სწორედ ერთ-ერთი ასეთი მებრძოლია.

28 წლის თოფურიამ უკვე დაამტკიცა, რომ MMA-ის ყველა დროის ერთ-ერთი საუკეთესო მებრძოლია და ქვემსუბუქი და მსუბუქი წონითი დივიზიონების საჩემპიონო ქამრებს დაეუფლა. მისი მიღწევა კიდევ უფრო შთამბეჭდავია, თუ გავითვალისწინებთ, რომ ბოლო სამ სატიტულო ორთაბრძოლაში UFC-ის ლეგენდები — ალექსანდრ ვოლკანოვსკი, მაქს ჰოლოუეი და ჩარლზ ოლივეირა — დაამარცხა.

ოლივეირასთან გამარჯვების შემდეგ თოფურია ESPN-ის Pound-for-pound რეიტინგის პირველ ადგილს ზედიზედ 20 კვირის განმავლობაში იკავებდა. როდესაც UFC-ის მატჩმეიკერები გეგმებს აწყობენ, თოფურია მათი განხილვის ერთ-ერთი მთავარი ფიგურაა. ის ფაქტი, რომ მან მცირე პაუზა აიღო, არაფერს აკლებს მის სტატუსსა და პოპულარობას“, – წერს ESPN-ი.

რეიტინგში მეორე ადგილზე PFL-ის მებრძოლი, დაკოტა დიჩევაა. მესამე ადგილზე ჯოშუა ვენი იმყოფება, რომელიც UFC-ის უმსუბუქესი წონის ჩემპიონია. მეოთხე პოზიციაზე ჯეკ დელა მადალენაა, მეხუთეზე კი მაიკლ მორალესი.