„არასდროს ჩამოწეროთ საქართველო!“ - FIBA-ს სტატია ჩვენს ნაკრებზე
ესპანეთთან საქართველოს კალათბურთელთა ნაკრების სენსაციურ და შთამბეჭდავ გამარჯვებას უამრავი ცნობილი გამოცემა გამოეხმაურა. გამონაკლისი არც FIBA EuroBasket-ის ოფიციალური ვებ გვერდია, რომელმაც ალექსანდრ ჯიკიჩის გუნდს სტატიაც მიუძღვნა.
რას წერს FIBA EuroBasket-ი საქართველოს ნაკრებზე:
„არასდროს ჩამოწეროთ საქართველო! ფიქრობდით, რომ მათ გაუჭირდებაოდათ? კიდევ ერთხელ დაფიქრდით!
ზაფხულის ყველა ექვსივე სპარინგი წაგებული ჰქონდათ. მათი მთავარი ვარსკვლავები ეჭვების მძიმე ტვირთით იწყებდნენ ტურნირს. ყველა გათვლითა და პროგნოზით, საქართველო „სიკვდილის ჯგუფში“ გასაჭირს უნდა გადაყროდა. და მაინც - ისინი აქ არიან! მათ ძარღვებში ჩქეფს საქართველოზე დაფუძნებული ურყევი სიამაყე, რომელმაც ტურნირის სტარტზე მოქმედი ჩემპიონი ესპანეთი დაამარცხა.
„0-6 ცუდი შედეგია, ამას ვერ დავმალავ, მაგრამ ჩვენ ხასიათი ვაჩვენეთ, ქართული სული, ერთიანობა და გამძლეობა. აი, ესაა შედეგი,“
– თქვა ბექა ბურჯანაძემ.
„ყველამ იცოდა, რომ მოსამზადებელ თამაშებში 0-6 წავაგეთ. ძალიან რთული იყო პოზიტიურობის შენარჩუნება. წელს ერთად არც ერთი თამაში არ გვქონდა მოგებული. მაგრამ გეგმამ გაამართლა – ძლიერ მეტოქეებს ვეთამაშეთ, რათა მზად ვყოფილიყავით,“
– დაამატა NBA-ის ცენტრმა გოგა ბითაძემ.
მარცხების ერთ-ერთი მიზეზი იყო ისიც, რომ მთავარ მწვრთნელ ალექსანდარ ჯიკიჩს არასდროს ჰყავდა სრული ბირთვი ერთად. ზოგიერთი მოთამაშე თითო მატჩს ტოვებდა და ხანდახან ვარჯიშზე სულ რვა კაცი ჰყავდა. კაპიტანი თორნიკე შენგელია, გუნდის გული და სული, მოსამზადებელ ციკლს მთლიანად დააკლდა და მიზეზი გულის არითმია იყო, რის გამოც ბარსელონაში სამედიცინო შემოწმებებს გადიოდა.
„მართალი არ ვიქნები, თუ ვიტყვი, რომ ექვსი მარცხის შემდეგ ბიჭები თავს კარგად გრძნობდნენ. ჩემი ერთადერთი სურვილი იყო - გუნდს საკუთარი თავის ისევ დაეჯერებინა, ერთმანეთის და საკუთარი შესაძლებლობების გვერწმუნა“.
– აღნიშნა შენგელიამ.
„მწვრთნელს ძალიან ბევრი სირთულე შეხვდა. ერთ დღეს ორი მოთამაშე აკლდა, მეორე დღეს – სამი… ჯიკიჩი მწვრთნელი რომ არ იყოს, მშვენიერი ფსიქოლოგი იქნებოდა,“
– დაამატა კაპიტანმა.
ჯიკიჩს ვარჯიშისთვის გუნდი მხოლოდ ერთხელ ჰყავდა სრული შემადგენლობით და ისიც კვიპროსში. მატჩის წინ კითხვის ნიშნის ქვეშ იდგა როგორც შენგელიას, ისე NBA-ის ფორვარდის სანდრო მამუკელაშვილის თამაში, რომელსაც ტერფის ტრავმა აწუხებდა.
„შენგელიას თამაში, სანდროს თამაში – ეს მათი გადაწყვეტილებაა. მე მოთამაშეებს არასდროს ვაძალებ. ჩვენი სამედიცინო გუნდის რეპორტი უნდა ნახოთ – ღიმილისმომგვრელია. რაც მათ გააკეთეს, საოცარია. სასწაულებს ახდენენ.“
– თქვა ჯიკიჩმა მატჩის შემდეგ პრესკონფერენციაზე.
როცა ჯიკიჩს ჰკითხეს, ელოდა თუ არა, რომ შენგელია 20 წუთს ითამაშებდა, გაიცინა, თავად კაპიტანმა კი თავი დააქნია და თქვა: „დიახ, ველოდი.“
„ორ მოთამაშეს დავავალეთ, რომ ის ძალით დაეკავებინათ, რათა სკამზე დარჩენილიყო, რადგან ის ასეთია. ჩემი საქმე იყო თოკოსთვის ამის საშუალება არ მიმეცა,“
– დაამატა ჯიკიჩმა.
მაგრამ ესაა შენგელიას და მთლიანად საქართველოს ხასიათი. და პირველი სენსაცია უკვე ისტორიის ფურცლებზეა“.
- წერს FIBA EuroBasket-ი.
შეგახსენებთ, რომ საქართველოს ნაკრები მეორე ტურის შეხვედრას 30 აგვისტოს გამართავს. ჯიკიჩის გუნდი იტალიას დაუპირისპირდება. შეხვედრა კვლავ 16:00-ზე დაიწყება.
