ვილიარეალის ინტერესი ესპანეთშიც დაადასტურეს | რას წერენ მიქაუტაძეზე

„ლიონის“ ქართველი ფეხბურთელი, გიორგი მიქაუტაძე „ვილიარეალის“ ინტერესის ობიექტია. გუშინ, Footmercato-მ დაწერა, რომ „ყვითელი წყალქვეშა ნავი“ თავდამსხმელს ეძებს და მიქაუტაძის კანდიდატურას სერიოზულად განიხილავს. უფრო მეტიც, კლუბი მზად არის, მის სანაცვლოდ 30 მილიონი ევრო გადაიხადოს.

ფრანგული გამოცემის ინფორმაციას ესპანური მედია გამოეხმაურა. Cadena Ser-მა დაადასტურა, რომ „ვილიარეალს“ მიქაუტაძის გადაბირება ნამდვილად სურს, თუმცა დაამატა, რომ გარიგების ფინანსური მხარის დახურვა მარტივი არ იქნება.

„ფინანსური თვალსაზრისით, ტრანსფერის დასრულება სირთულეებთან არის დაკავშირებული. მართალია, „ვილიარეალი“ 15-მილიონიან შეთავაზებას განიხილავს, მაგრამ „ლიონმა“ საკუთარი პოზიცია მკაფიოდ დააფიქსირა — ფრანგული კლუბი მინიმუმ 25 მილიონ ევროს ითხოვს, რასაც დამატებით 5-მილიონიანი ბონუსები უნდა დაერთოს. ამ ეტაპზე მოლაპარაკებები გრძელდება,“ – აღნიშნავს გამოცემა.

ცნობილი სატრანსფერო ექსპერტის, ეკრემ კონურის მიხედვით, „ვილიარეალის“ გარდა, მიქაუტაძით „ბრენტფორდიც“ დაინტერესებულია. ამ მომენტისთვის, „ყვითელ წყალქვეშა ნავი“ უფრო აქტიურია, თუმცა ვითარება ნებისმიერ მომენტში შეიძლება შეიცვალოს.