ჟოტას ხელფასი ოჯახს - ლივერპულის დიდსულოვანი საქციელი

ავტოავარიის შედეგად ტრაგიკულად გარდაცვლილი დიოგო ჟოტას კონტრაქტის ვადა  „ლივერპულთან“ 2027 წლის ზაფხულში იწურებოდა და მერსისაიდული გრანდის ხელმძღვანელებმა დიდსულოვანი გადაწყვეტილება მიიღეს - ისინი ხელშეკრულებით გათვალისწინებულ ხელფასს პორტუგალიელი ნახევარმცველის ოჯახს ჩაურიცხავენ და გარდა ამისა, მის შვილებს სწავლის ფულს მთლიანად გადაუხდიან.

ჟოტასთან დაკავშირებულმა ტრაგედიამ „ლივერპულის“ წინასასეზონო მზადებაშიც სერიოზული კორექტივები შეიტანა - კლუბი 4 ივლისს უნდა შეკრებილიყო, თუმცა მომხდარის გამო, ფეხბურთელებს დამატებითი დასვენების დღეები მისცეს და მზადების დაწყება 7 ივლისისთვის გადაიდო. 13 ივლისს უკვე „პრესტონთან“ საკონტროლო მატჩია დაგეგმილი, რის შემდეგაც „წითლები“ იაპონიასა და ჰონგ-კონგში აზიური ტურნეს ფარგლებში გაემგზავრებიან.

ცნობისათვის, დიოგო ჟოტა თავის ძმა ანდრესთან ერთად, ესპანეთში, სამორას პროვინციაში მომხდარი ავარიის შედეგად გარდაიცვალა. მათ დღეს, პორტუგალიაში მდებარე მშობლიურ ქალაქ გონდომარში დაკრძალავენ.