“ჩვენ თავზე ვართ დამოკიდებული“ - სვანაძე პორტუგალიასთან მატჩის წინ

"ძალიან მაღალი დონის ნაკრებებთან ვთამაშობთ და ბოლო ტურის წინ გვაქვს შანსი, რომ შემდეგ ეტაპზე გავიდეთ. ჩვენს თავზე ვართ დამოკიდებული. საბა საზონოვის მდგომარეობა ფასდება და ხვალ გვეცოდინება ითამაშებს თუ არა.

ამ ნაკრებმა ბევრი რამე დაამტკიცა. ეს ნაკრები უკვე შედგა ერთ-ერთი საუკეთესო ასაკობრივი ნაკრებების ისტორიაში. 

ყველაფერი გაკეთდება იმისთვის, რომ ამ ურთულეს შეხვედრაში მაქსიმუმი გავიღოთ. ის სტილი და გუნდურობა უნდა ვაჩვენოთ, რასაც წლების განმავლობაში ვაჩვენებდით.

ყველაზე მთავარი არის რწმენა, რომელიც ჩვენს ფეხბურთელებში ჭარბადაა. ამას თითოეულ ახალ ფეხბურთელს ვუნერგავ. მთვარი რწმენა და ფსიქოლოგიური მდგომარეობა იქნება. ეს ფაქტორები ყველაზე მთავარია.

ჩვენ უკან დასახევი გზა არ გვაქვს. ძალიან ბევრი დეტალის გათვლაა საჭირო იმისთვის, რომ შედეგს მივაღწიოთ. საფრანგეთთან მატჩში 2 ემოცია იყო. ისტორიულ შედეგთან ახლოს ვიყავით. დეტალურად განვიხილეთ ბოლო წუთები. ხვალ ველოდები იმ დადებით ემოციას, რომელიც საფრანგეთთან მატჩიდან გამოგვყვა.

საფრანგეთთან უფრო მეტად დაცვაში მოგვიწია თამაში. ვფიქრობ, ამაში გასაკვირი არაფერია. მე ხშირად აღვნიშნავ და გავიმეორებ, რომ ხარატიშვილი ჩვენი გუნდის ნაწილია. ზოგადად მყარი მეკარე იმას ნიშნავს, რომ დაცვა იმედიანად არის.

რაც შეეხება ჩვენ დაცვაში თამაშს, ეს დამოკიდებულია იმაზე, თუ ვის ვეთამაშებით. ჩვენ ხშირად გვერევა ხოლმე ერთმანეთში ეს ყველაფერი, რომ აღვიქვათ რეალობა სწორად. ჩვენ აქ იმიტომ ვართ, რომ მყარად ვდგავართ მიწაზე. მერწმუნეთ, არ არის მარტივი, ურთულესია, როდესაც დგას 2 რეალობა, გავდივართ მოედანზე და ვეთამაშებით ტოპ გუნდებს. ეს ყველაფერი ალბათ მარტივად ჩანს. ეს ყველაფერი ძალიან რთულია!

 ძალიან დიდი ძალა დაგვეხარჯა. დღესაც აღდგენის პროცესია. გადავახტეთ თუნდაც საკუთარ თავს. ვეცდებით მიზანს მივაღწიოთ და ეს ყველაფერი გავაკეთოთ"

ძალიან დიდი სამუშაო შესრულდა, დიდი სტაბილურობაა, რაც ქართულ ფეხბურთს და შემდეგ თაობებს სჭირდებათ. ქართული ფეხბურთის ისტორია ყოველწლიურად იწერებოდა.

ცნობისთვის, რამაზ სვანაძისა და რუი ჟორჟეს სამწვრთნელო დაპირისპირება კიდევ ერთხელ შედგება, ეს მათი მესამე სამწვრთნელო დუელია. პირველად 2022 წლის 24 სექტემბერს, როცა ამხანაგურ მატჩში პორტუგალიამ 4:1 მოიგო. 2:0-ზე ლუკა გაგნიძის პასით გიორგი მოისწრაფიშვილმა შეაგდო. სლოვაკეთში მყოფთაგან ამ მატჩში ლუკა გაგნიძემ, საბა ხვადაგიანმა, საბა საზონოვმა, გიორგი კვერნაძემ და ლევან ოსიყმაშვილმა ითამაშეს, ლუკა ხარატიშვილი სათადარიგოთა სკამზე იჯდა.