უდინეზეს ზედიზედ მეორე გამარჯვება - გოგლიჩიძემ 75-ე წუთიდან ითამაშა

იტალიის სერია A-ს მე-3 ტურში, საბა გოგლიჩიძის „უდინეზე“ სტუმრად „პიზას“ დაუპირისპირდა და დაძაბულ ბრძოლაში მინიმალური სხვაობით, 1:0 დაამარცხა.

ქართველი მცველი სასტარტო შემადგენლობაში არ ყოფილა და მოედანზე 75-ე წუთზე გამოჩნდა, როდესაც ანგარიში უკვე 1:0 იყო. დამატებული დროის ჩათვლით გოგლიჩიძეს 20-წუთამდე დაეთმო და ეს პერიოდი დამაჯერებლად, უშეცდომოდ ჩაატარა.

„უდინეზემ“ ერთადერთი გოლი მე-14 წუთზე გაიტანა. გამარჯვების გოლის ავტორი იკერ ბრავო გახდა.

საბა გოგლიჩიძისთვის ეს მატჩი „უდინეზეს“ მაისურით სერია A-ში მეორე იყო. ქართველი მცველი მოედანზე იტალიის ჩემპიონატის მეორე ტურში, „ინტერის“ წინააღმდეგაც გამოჩნდა, რომელიც მისმა გუნდმა 1:2 მოიგო. ამ მატჩში გოგლიჩიძე მოედანზე მეორე ტაიმის დაწყებამდე შევიდა და თავისი გუნდის გამარჯვებაში მნიშვნელოვანი როლი ითამაშა.

3 ტურის შემდეგ „უდინეზე“ სერია A-ს სატურნირო ცხრილში დროებით მე-3 პოზიციაზე აღზევდა. დროებით იმიტომ რომ მის კონკურენტებს მე-3 ტურში თავისი შეხვედრები ჯერ კიდევ ჩასატარებელი აქვთ. გოგლიჩიძის გუნდი მომდევნო ტურში საკუთარ მოედანზე „მილანს“ დაუპირისპირდება. მატჩი 20 სექტემბერს გაიმართება.