ჩემპიონთა ლიგაზე დამატებითი დრო უქმდება? | უეფა ცვლილებებზე მსჯელობს

უეფა ჩემპიონთა ლიგაზე დამატებითი დროის გაუქმებაზე მსჯელობს. Bild-ის ინფორმაციით, ცვლილება შესაძლოა უკვე მომდევნო სეზონიდან ამოქმედდეს.

გამოცემის ინფორმაციით, ამჟამად ევროპული ფეხბურთის მმართველი ორგანო რეგლამენტის შესაძლო ცვლილებებთან დაკავშირებით კლუბების პოზიციებს ეცნობა.

კერძოდ, უეფა დამატებითი დროის გაუქმებაზე მსჯელობს: თუ ორი მატჩის ჯამში ფრე დაფიქსირდება, გამარჯვებული პენალტების სერიაში გამოვლინდება. ამ ცვლილების მიზანი ფეხბურთელებზე დატვირთვის შემცირებაა.

გარდა ამისა, განიხილება ცვლილება, რომლის მიხედვითაც ლიგის ფაზიდან პირდაპირ 1/8-ფინალში გასული გუნდები პლეიოფში ყველა საპასუხო მატჩს საკუთარ კედლებში გამართავენ. ამჟამად ეს წესი მხოლოდ 1/8-ფინალზე ვრცელდება.

კიდევ ერთი ცვლილება, რომელსაც უეფა განიხილავს, ერთი ქვეყნის წარმომადგენელ კლუბებს ეხება. შესაძლოა ასეთი გუნდები ერთმანეთს 1/4-ფინალამდე ვეღარ შეხვდნენ. უეფას აზრით, პლეიოფის ადრეულ სტადიებზე ასეთი მატჩები ნაკლებად საინტერესოა როგორც გულშემატკივრებისთვის, ასევე მაუწყებლებისთვის.

ჩემპიონთა ლიგის რეგლამენტში შესატანი ცვლილებები შესაძლოა დამტკიცდეს უეფას ასამბლეაზე, რომელიც 30 მაისს მიუნხენში გაიმართება.