ზურიკოს რეკომენდაციით - მწვანეები ბორდოდან კიდევ ერთ მოთამაშეს იმატებენ

ზურიკო დავითაშვილი რამდენიმე კვირაა რაც „სენტ ეტიენს“ შეუერთდა და ოფიციალურ მატჩში ჯერ არ უთამაშია, მაგრამ ვარჯიშებსა და „ვილიარეალთან“ საკონტროლო მატჩში იმდენად კარგი შთაბეჭდილება დატოვა, რომ ის უკვე არამხოლოდ მთავარ მწვრთნელის, არამედ კლუბის ხელმძღვანელების თვალში დიდი ავტორიტეტით სარგებლობს. ამის დასტური სავარაუდო ტრანსფერია, რომლის განხორციელებასაც „მწვანეების“ ხელმძღვანელები გეგმავენ.

Mercato.fr-ის ცნობით, სულ მალე „სენტ ეტიენი“ „ბორდოს“, რომელიც გაკოტრების პირასაა, კიდევ ერთხელ დაუკავშირდება და დავითაშვილის რეკომენდაციით მის ყოფილ თანაგუნდელს დაიმატებს. საუბარია ამპლუით მარჯვენა მცველ მალკოლმ ბოკელეზე, რომელსაც საჭიროების შემთხვევაში ცენტრალური მცველის პოზიციაზეც შეუძლია ასპარეზობა. კამერუნელმა მოთამაშემ ჟირონდას გუნდში გასულ სეზონში ჩატარებულ 28 შეხვედრაში 1 საგოლე გადაცემა შეასრულა.

შეგახსენებთ, რომ დავითაშვილმა „სენტ ეტიენში“ ჩატარებულ სადებიუტო მატჩში „ვილიარეალთან“ დუბლი შეასრულა და ერთი საგოლე პასიც მიაწოდა.