ურუგვაიმ არგენტინაში მოიგო - კოლუმბიამ ბრაზილია დაამარცხა

სამხრეთ ამერიკაში 2026 წლის მსოფლიო ჩემპიონატის საკვალიფიკაციო ეტაპის მე-5 ტურის შეხვედრები გაიმართა, რომელთაგან 2 განსაკუთრებულ ყურადღებას იქცევდა.

არგენტინა შინ ურუგვაისთან 0:2 დამარცხდა, ხოლო ბრაზილია კოლუმბიაში 1:2.

„ლა ბომბონერაზე“ არგენტინამ მარსელო ბიელსას ურუგვაის ვერაფერი მოუხერხა და დიდხნიანი პაუზის შემდეგ, ასე უშანსოდ პირველად წააგო.

პირველი ტაიმი მეტნაკლებად თანაბარ ბრძოლაში მიმდინარეობდა, ბურთს ძირითადად არგენტინელები აკონტროლებდნენ, მაგრამ უფრო სახიფათოდ სტუმრები უტევდნენ.

41-ე წუთზე ნაუელ მოლინას ინდივიდუალურმა შეცდომა, რონალდ არაუხოს გოლით დასრულდა და „ლა სელესტემ“ კომფორტული უპირატესობა მიიღო. ამის შემდეგ, არგენტინელებს მომენტების შექმნა ძალიან უჭირდათ. ბიელსას გუნდმა ზონები იდეალურად გადაკეტა.

ყველაფერი 87-ე წუთზე დასრულდა, როცა მესის შეცდომის შემდეგ წამოწყებული კონტრშეტევა დარვინ ნუნესმა გოლით დაასრულა.

ბიელსას ნაკრებმა წინა ტურში ბრაზილიას 2:0 მოუგო, ამჯერად კი არგენტინას იმავე ანგარიშით სძლია.

რაც შეეხება კოლუმბიაში გამართულ შეხვედრას, ბრაზილიელები მარტინელის გოლით მე-4 წუთიდანვე იგებდნენ, თითქოს სამი ქულაც უნდა გაეფორმებინათ, თუმცა ბოლო 15 წუთში ყველაფერი შეიცვალა.

ლუის დიასმა 75-ე და 79-ე წუთებზე კოლუმბიელებს ნანატრი გამარჯვება მოუტანა.