შეთანხმება ბონუსის თაობაზე | რა ხდება პარი სენ-ჟერმენსა და მბაპეს შორის
კილიან მბაპესა და „პარი სენ-ჟერმენს“ შორის არსებული ურთიერთობა უცხოური პრესის მთავარი სასაუბრო თემაა. რამდენიმე წუთის წინ, RMC Sports-ის ჟურნალისტმა, ფაბრის ჰოუკინსმა ამ საკითხზე ისაუბრა და საინტერესო ინფორმაცია გაავრცელა.
ჰოუკინსის მიხედვით, კლუბსა და მბაპეს შეთანხმება აქვთ მიღწეული თანხასთან დაკავშირებით, რომელიც პსჟ-მ ფეხბურთელს უნდა გადაუხადოს. საუბარია 80 მილიონ ევროზე, რომელიც სხვადასხვა ბონუსების გათვალისწინებით დაგროვდა და მხარეები შეთანხმდნენ, რომ მბაპე ფულს არ მიიღებს.
„პარი სენ-ჟერმენს“ იმედი აქვს, რომ კილიანთან კონტრაქტს გაახანგრძლივებს და მისი გუნდში დატოვება სურს. RMC Sports-ის მიხედვით, ყველაფერი ფრანგ სუპერვარსკვლავზეა დამოკიდებული და მოხდება ის, რასაც კილიანი მოისურვებს.
უცხოურ პრესაში გავრცელებული ინფორმაციით, მბაპეს გაფორმება „ლივერპულსა“ და „ბაიერნს“ სურთ, „რეალი“ კი საბოლოო არჩევანს ზაფხულში გააკეთებს. სხვათა შორის, დღეს, AS-მა დაწერა, რომ პსჟ ცდილობს, მბაპე დარჩენაზე დაიყოლიოს და დაარწმუნოს, რომ „სამეფო კლუბში“ მარცხენა ფლანგზე არ ათამაშებენ, რადგან ამ პოზიციაზე ვინისიუს ჟუნიორი ასპარეზობს.