ტორპედოს ზედიზედ მესამე მოგება - ბათუმელებმა კონკურენტთან წააგეს

საწყისი 12 ტურის განმავლობაში „დინამო ბათუმი“ Crystalbet ეროვნულ ლიგაში წაუგებელი იყო, ბოლო ორი მატჩიდან კი ორივე წააგო. რამდენიმე დღის წინ საკუთარ სტადიონზე „იბერიასთან“ (2:3) განცდილი მარცხის შემდეგ, გიორგი ჭიაბრიშვილის მიერ მომზადებულმა გუნდმა ამჯერად „შენგელია არენაზე“ „ტორპედოსთან“ (0:1) წაგება მიაყოლა, რომელიც ძალიან მძიმე სტარტის შემდეგ ნელ-ნელა გონს მოდის და სატურნირო ცხრილშიც პროგრესირებს.

შეხვედრის პირველ ნახევარში უფრო მეტად ბათუმელები აქტიურობდნენ, თუმცა მეორე ტაიმის სტარტზე ინიციატივა მთლიანად ქუთაისელების ხელში გადავიდა, რასაც 54-ე წუთზე ბიორნ იონსენის გოლიც მოჰყვა. ნორვეგიელმა ფორვარდმა შეტევა თავადვე დაიწყო და ბურთი პაატა ღუდუშაურის პასით გაიტანა, რომელმაც ასისტი ზედიზედ მეორე ტურში შეასრულა. იონსენის ანგარიშზე კი მიმდინარე გათამაშებაში 4 გოლია.

Crystalbet ეროვნული საფეხბურთო ლიგის XIV ტური ხვალ სამი შეხვედრით დასრულდება. „გაგრა“ საკუთარ სტადიონზე ფოთის „კოლხეთს“ უმასპინძლებს, „დილა“ სათამაშოდ თელავში ჩავა, ხოლო საგარეჯოს „გარეჯის“ მეტოქე თბილისის „დინამო“ იქნება.