“მაღალი მიზნებისთვის ბრძოლა შეგვიძლია“ - ჩავი ანტვერპენთან მატჩის წინ
2023/2024 წლების სეზონის ჩემპიონთა ლიგა იწყება. პირველ ტურში „ბარსელონა“ „ანტვერპენს“ უმასპინძლებს. მატჩის წინ, კატალონიელთა მთავარმა მწვრთნელმა ჩავი ერნანდესმა კომენტარი გააკეთა.
ჩავი:
„ფეხბურთელები დიდი ენთუზიაზმით ემზადებიან, მაგრამ ეს ყველაფერი აკვიატებაში არ უნდა გადაგვივიდეს. ხვალინდელ მატჩში ჩვენი იდენტობა და პიროვნულობა უნდა დავამტკიცოთ. მთავარი მიზანი ჯგუფური ეტაპის დაძლევაა. დანარჩენზე მერე ვისაუბროთ.
ვფიქრობ, გასულ სეზონში ევრო ასპარეზზე სათამაშო ხარისხი ცუდი არ იყო. ცუდი მხოლოდ შედეგი იყო. ახლა გავძლიერდით და უნდა ვაჩვენოთ, რომ კონკურენტუნარიანი გუნდი ვართ. მაღალი მიზნებისთვის ბრძოლა შეგვიძლია.“
შეგახსენებთ, რომ ჩემპიონთა ლიგის ბოლო 2 სეზონში, „ბარსელონა“ ჯგუფში ჩარჩა და წარმატებას ვერც ევროპის ლიგაზე მიაღწია.
ცნობისთვის, „ბარსელონასა“ და „ანტვერპენის“ დაპირისპირება 19 სექტემბრით თარიღდება და თბილისის დროით 23:00-დან დაიწყება.
