კიტეიშვილის აღიარება - ქართველი ფეხბურთელი ტურის სიმბოლურ გუნდში
ავსტრიის ბუნდესლიგის მე-7 ტურში ოთარ კიტეიშვილმა „ზალცბურგს“ საოცარი გოლი გაუტანა. სტატისტიკურმა ვებგვერდმა Sofascore-მა „შტურმის“ „ათიანი“ ტურის სიმბოლურ გუნდში შეიყვანა, მას 8,4 დაუწერა.
მე-7 ტურში კიტეიშვილზე მაღალი შეფასება მხოლოდ „ტიროლის“ ფორვარდმა ნიკ პრელეცმა (8,6) და „ჰარტბერგის“ შემტევმა დონის ავდიაიმ (8,9) მიიღეს.
„ზალცბურგთან“ მატჩში 27 წლის კიტეიშვილმა გოლის გარდა საგოლე პასი შეასრულა, შეხვედრა კი 2:2 დასრულდა. მისი 26 გადაცემიდან 19 ზუსტი იყო (73 პროცენტი). დრიბლინგის ორი მცდელობიდან ორივე წარმატებული გამოვიდა, 14 ორთაბრძოლიდან 8 მოიგო.
მატჩის შემდეგ კიტეიშვილმა მედიასთან ისაუბრა: „ეს დიდებული იყო, არც კი დამინახავს ბურთი როგორ წავიდა კარისკენ’’.
27 წლის ოთარ კიტეიშვილმა მიმდინარე სეზონში, ყველა ტურნირის ჩათვლით, „შტურმში“ 10 მატჩი ჩაატარა. მის აქტივში 3 გოლი და 3 საგოლე პასია.
UEFA-ს ევროპა ლიგის ჯგუფური ეტაპის პირველ ტურში „შტურმი“ ლისაბონის „სპორტინგს“ მიიღებს, შეხვედრა 21 სექტემბერს გაიმართება (21:00). კიტეიშვილმა მოახლოებული შეხვედრის შესახებაც ისაუბრა:
„ზალცბურგის“ მსგავსად ლისაბონის „სპორტინგიც“ ძლიერი გუნდია. „ზალცბურგთან“ ბევრი რამ გავაკეთეთ, მაგრამ „სპორტინგთან“ შეხვედრაში ოდნავ უკეთესები უნდა ვიყოთ’’.
