ვეგას გოლდენ ნაითსმა სტენლის თასი მოიგო | სუპერფინალურ სერიაში ფლორიდა გაანადგურეს

„ვეგას გოლდენ ნაითსი“ სტენლის თასის გამარჯვებული გახდა. NHL-ის პლეიოფის სუპერფინალურ სერიაში ლას-ვეგასელთა მეტოქე „ფლორიდა პანტერსი“ გახლდათ და „გოლდენ ნაითსმა“ მეტოქეს 5 შეხვედრაში მოუგო - 4:1.

THE VEGAS GOLDEN KNIGHTS ARE YOUR 2022-23 #STANLEYCUP CHAMPIONS!!! ???? pic.twitter.com/MR2sAf3KLb
— NHL (@NHL) June 14, 2023

„ვეგასმა“ სუპერფინალური სერია საკუთარ კედლებში დახურა და „ფლორიდას“ შანსი არ დაუტოვა. „გოლდენ ნაითსმა“ „პანტერსს“ 9 შაიბა გაუტანა და ყოველგვარი პრობლემების გარეშე იმარჯვა - 9:3. ლას-ვეგასელთა მხრიდან თავი მარკ სტოუნმა (ჰეთ-თრიქი), ნიკოლას ჰაგმა, ალეკ მარტინესმა, რაილი სმიტმა, მაიკ ამადიომ, ივან ბარბაშევმა და ნიკოლას როიმ გამოიჩინეს.

For the final time this season... good night hockey fans. ❤️ #StanleyCup pic.twitter.com/NO3jcvkdQV
— NHL (@NHL) June 14, 2023

„გოლდენ ნაითსის“ დებიუტი NHL-ში 6 წლის წინ შედგა და სტენლის თასის მოსაგებად ამაზე მცირე დრო მხოლოდ „ედმონტონს“ დასჭირვებია, რომელმაც ტრიუმფს 5 წელიწადში მიაღწია. NHL-ში ადგილის მიღების შემდეგ, „ვეგასის“ მფლობელმა, უილიამ ფოლიმ განაცხადა, რომ მისი გუნდის მიზანი 3 წელიწადში პლეიოფში გასვლა, ხოლო 6 წელიწადში სტენლის თასის მოგება იყო. ფოლის სიტყვები ახდა და მისი გუნდი ისტორიული წარმატებით ტკბება.

Another lift for the books. ???? #StanleyCup pic.twitter.com/Hw5iyTkMjO
— NHL (@NHL) June 14, 2023

გეტყვით იმასაც, რომ „კონ სმაიტის ტროფის“ მფლობელი „ვეგას გოლდენ ნაითსის“ მოთამაშე, ჯონათან მარშესო გახდა. ეს ჯილდო პლეიოფის ყველაზე ძვირფას მოთამაშეს გადაეცემა და მარშესომ 22 შეხვედრაში 25 ქულა დააგროვა. მის ანგარიშზე 13 გოლი და 12 შედეგიანი გადაცემაა.